二人女子組合Twins噚日以黑白雙煞嘅造型，到旺角為佢哋嘅主題Ｋ房進行揭幕儀式，今次係該卡拉OK破天荒全層都以Twins做主題，所以佢兩個坦言置身卡拉ＯＫ就好似包咗場一樣，加埋大會送畀佢兩個一世免費唱Ｋ嘅通行證，難怪佢哋笑話：「如果冇飯開就會嚟食飯，重可以請埋啲朋友嚟，不過唔知佢哋會唔會badlist我哋。」
過年留家唔搵小方
阿Sa同阿嬌兩個大年初一都要到北京做節目，之後有三日假期，馮仁昭問佢哋去唔去旅行，但佢哋都異口同聲話會留喺屋企休息，舊年新年同小方方力申秘密同遊瑞士嘅阿嬌重話可以嘅話想同英皇班同事去歐遊，阿Sa亦話：「我哋同祖兒話去歐洲，點知吳雨大哥就話去番禺，我即刻sell咗條橋話去旅行順便拍埋旅遊特輯，最好就係crossover埋蔡瀾一齊去，咁重有好嘢食㖭。」
阿Sa重話自己好想去浸溫泉，問佢驚唔驚俾人影走光相，阿Sa話：「唔怕，最多到時話拍緊嘢唔露得點，等對方可以畀我着衫浸。」
