香港打工皇帝好搵係人都知，因為每年稅局都會講吓十大打工皇帝要交幾多稅，呢班CEO的薪酬，喺亞洲數一數二，但同全球相比，就只係排第11名。
TowersPerrin出咗份全球26個地區CEO薪酬調查，排首三位依次係美國、法國和英國，而香港就十甲不入，排喺巴西之後，後面就有南韓同日本跟住。唔通真係好似稅局咁講，今年打工皇帝要交嘅稅比前一年減咗18%，所以影響咗排位？
雖則稅局冇揭露打工皇帝嘅真正身份，大家都估到有邊幾個；好似和黃兩位猛將霍建寧和周胡慕芳、思捷環球兩名主帥潘祖明同高漢思，中信泰富范鴻齡等，睇怕都走唔甩。
其中霍建寧04年度單是花紅都超過1億，酬金總數比03年多出9%。咦，美國嘅CEO薪酬過半來自跟業績掛鈎嘅花紅或獎金，據講美國呢一套正吹到亞洲，和黃就一早迎合國際潮流。