曾幾何時，並唔係家家戶戶都有電視機，「買電視過年」係一件何其體面之事！AVMAN做Sales都經歷過賣大電視、後投、Plasma同LCDTV年代，買電視過年都仍然係香港人一種習俗！儘管連月來經濟數據點樣「唱好香港」，呢啲都只係紙上談兵，最實際又現實嘅係，場內「電視機」去貨情況較去年同期少咗近半，感覺仍然吹緊淡風！
文：AVMAN
淡市當然要做啲嘢啦！最近就有LCDTV代理趁呢個出機「旺季」，推出買機優惠，咁啱得咁橋都係玩「1拖1」套餐；一般雜嘜機6、7千就一部，絕大部份都係OEM砌機，簡單講係買大廠嘅舊技術砌埋一嚿！質素當然有所差距，喺度都唔想多作介紹；如果想要有質素嘅，以下有3個近期場內熱門「日本仔」推介，想買機過年者留意。
A餐40"Big爆BRAVIA$27,800
現時一般入門LCDTV都係32"，無他嘅，平嘛！上到40"呢啲大吋數，好多都會揀日本貨，始終技術要求會高啲，日產機質素同QC都好啲，玩得放心好多！剛落場嘅KLV-S40A10呢期幾當賣，佢秉承SONY一向色搶又夠利嘅傳統，好多人試機時一睇難忘！而且$27,800呢個價位相對幾平吓，一般大牌子日本機，呢個價位多數只做到37"左右，加埋𠵱家出機重多送一部15"LCDTV細機放喺房，等於機價再減$4,280！不過喺度提提大家，直至農曆新年前都會一直缺貨，想出機要快手。
B餐買32"送26"$23,980
筆者一直都幾鍾意HITACHI出嘅LCDTV，一樣玩靚畫質鋒利感！據行內人報料，佢哋想趁行政年度前做好啲個銷數，所以呢個優惠都幾不計成本吓！32LD8800TA係佢呢期最當賣嘅32"，全日本製造加最新IPS高質螢幕，機身有兩組HDMI輸入，可插SD卡播相，基本乜都玩齊，不過最精髓係佢個跟機座枱架，有遙控轉向功能，真係不得了。1拖1重有部26"嘅26LD8000TA，如果照正常分開買，機價要成$31,880，𠵱家套餐價$23,980，足足平咗$7,900。
C餐泰製日機1拖1$19,990
C餐都係HITACHI推出嘅，呢個套餐嘅吸引處係，銀碼細啲，唔過2萬就玩到32"拖26"，放喺廳或放喺房一次過買齊，唔怕爭電視用！不過平當然有原因啦，部主力32"其實是在泰國生產，不過以HITACHI咁大間廠，相信問題不大；而1拖1送嘅都係同廠26LD8000TA，呢個套餐亦比分開買平咗$5,890！都係過年抵玩之選，剩咗啲錢用嚟封利是都好吖！
查詢：中原電器（27707608）
地址：旺角西洋菜街南1A
