煲呔噚日宣布高層小執位，鬍鬚曾做大內總管、平叔坐鬍鬚曾個位、D姐補平叔個空缺，但冇講到邊個走去接替D姐做工商及科技局常任秘書長。
點知唐唐喺煲呔開完記者會之後三個零鐘，突然喺一個頒獎禮爆料話，新聞處處長蔡瑩璧做硬呢個位啦，重用英文爆多一次，話Yvonne蔡同平叔日後會緊密合作，組成excellentteam（最佳拍檔）！
新聞秘書嚇到面青
唐唐無厘頭爆料都唔係第一次，好似上次黃仁龍做律政司司長咁，唐唐喺個扶貧場合無端端漏口講咗個「好好嘅香港故事」，結果成功搶佔各大報章頭條，唔知係咪食過翻尋味，噚日一聽到記者問佢邊個會替俞小姐，唐唐即刻爆出蔡瑩璧個名，重用雙語一齊講，驚死啲記者唔識聽。
唐唐爆料就爆得過癮，但佢身邊嘅助手個個嚇到不知所措，好似新聞秘書羅志康咁，聽完即刻坐立不安，不斷喺唐唐後面行嚟行去，成塊面青晒，睇怕都係諗緊點補鑊。工貿署署長楊立門重同記者講，唔知道工商局有乜新人，但當啲行家同佢講，唐唐已經爆咗出嚟，當堂嚇咗楊立門一跳，佢老哥定一定神後，只好話期望同蔡瑩璧合作啦。
煲呔隨時臨場變陣
煲呔最憎人爆政府料，你爆乜佢就偏唔做，或者遲啲先做，等啲傳媒個個報錯晒。唔知會唔會因為唐唐搶閘，就特登臨時改變任命，將得罪晒全港教師嘅羅太，調過去工商及科技局，等唐唐爆錯料，又順便拆埋教改嘅炸彈。不過，到時唔知會唔會輪到啲中小企俾羅太迫到要跳樓。
八方舉腳支持唐唐提前爆料，佢假假哋都係特區第三把交椅，掌握港府嘅財金大權，如果連屬下係邊個都唔講得，咁就不如告老歸田好過！好似美國前總統列根咁，啲保鑣成日叫佢唔好成日行埋啲群眾度，佢睬啲保鑣都儍，因為佢先係總統。唐唐唔使驚，日後有乜料即管爆，唔使理其他人點講，咁先至證明你係一個獨立自主嘅財政司司長！
爆料熱線：29290000、27860099
報料傳真：26239278
報料電郵：[email protected]