鄭中基家裏放滿不少有紀念價值的東西，當中覺得最珍貴的，是看似平平無奇，但背後意義重大的物品，他說：「每個人都有童年，都會有小學幼稚園嘅物品，可能留住嘅唔多，所以長大後會特別覺得珍貴。我覺得最寶貴嘅係背後嘅故事同意義。」鄭中基帶來的珍貴物品，包括啤牌、影碟和氣槍等，其中魔術啤牌更由其父鄭東漢所送，閒時中基還會表演一下𠱁父親開心。
家傳之寶氣槍
我自細鍾意玩槍，喺美國考到個真槍牌，呢把槍係我○二年買嘅，係我收藏之中最貴同最鍾意嘅。當時喺雜誌見到有把真槍好靚，於是搵咗間氣槍舖訂造，又做到出嚟喎，我鍾意佢個樣唔似一把槍，槍頭係斜㗎！我當係家傳之寶咁保養㗎。
笑到忘嬲DVD
呢套《ThisisSpinalTap》係我睇過覺得最引到我笑嘅戲，當年飛機事件後好唔開心，壓力好大，有個好朋友就送呢隻DVD畀我，睇完我就笑得出，搞笑之餘加上諗起朋友嘅關懷，好窩心㗎。之後我每逢有唔開心嘅時候，就攞呢隻碟出嚟睇，有本專亂寫我嘅雜誌又作嘢時，我第一時間攞嚟睇，順番條氣，哈哈！
好歌啟發靈感
我以前睇過NicholasCage（尼古拉斯基治）同MegRyan（美琪賴恩）做嗰套《CityofAngels》（天使多情），主題曲係SarahMclachlan唱嘅，當時套戲播呢首歌個位係好到，音樂好簡單，只有琴聲同結他聲，好清，就咁我開始聽呢位女歌手嘅歌，然後買咗呢張演唱會碟。對音樂人嚟講，呢隻碟可以話係啟發到我好多嘢，喺作曲方面有叮一聲嘅感覺，呢個價值唔係錢可以買到。
出爐金曲金獎
今年得到無綫勁歌金曲嘅金曲金獎，個獎話畀我知，喺咁差嘅市道裏面，歌嘅質素始終係最緊要嘅，係推動我繼續做歌嘅一個好大原動力，係一個好大嘅鼓勵。個獎都算係我事業路上一個重要嘅記號，唔止係一個獎咁簡單，背後重記載住好多錫我嘅人一路支持住我嘅回憶。
速遞愛心啤牌
我早排開始學玩魔術啤牌，原來呢樣嘢可以帶歡樂畀大家，我屋企人平時喺屋企坐埋都係傾偈睇電視，有次我無無聊聊攞副啤牌出嚟表演，一向嚴肅嘅老竇都忍唔住笑，我媽、嫲嫲同細妹睇到好似小朋友咁好奇，大家都好開心。後來我老竇出埠公幹，就買咗呢副啤牌畀我，呢副牌比一般牌滑，專門變魔術用，香港冇得買㗎。
採訪：蔡如玉 攝影：林德雄
化妝：Yan 髮型：[email protected]
場地提供：LABRASSERIE,THEMARCOPOLOGATEWAY
