下星期就係農曆新年，相信唔少人都會趁呢個星期打機打餐飽，由CAPCOM推出嘅《新鬼武者》剛好趕及呢個星期返貨，定有唔少人將佢定為頭號爆機目標。今集唔再係金城武版嘅鬼武者擔正，改由蒼鬼結城秀康擔任主角，CAPCOM更特意為新作加入唔少新系統同元素，如同伴協力系統及最得人心係一閃斬殺系統加至7大類，係咁意都可閃爆敵人，爽得交關！
記者：許福合
《新鬼武者》早於上年E3已經公開展出，當時已經成為CAPCOM焦點作品之一，其後亦有試玩碟到港讓傳媒試玩，不過試玩碟好多系統都未完善，只能大約玩到第一版Boss，好多新設定如任務、技能武器都未能一試，今個星期正式推出，估唔到重係孖碟裝，可見故事劇情之豐富，而且新加系統令人相當之有新鮮感，新入門或老手都啱玩！
轉換角色戰鬥
《鬼武者》當然不能不提一閃系統，受到攻擊掌握時機作反擊，反擊力大，可秒殺敵人，發動時會配合閃光，視覺效果相當唔錯，由於一閃可以話係最重要技能，今集重可以按時機使用防閃、連鎖閃等，最好玩係跟同伴合作使出一閃，兩個人瘋狂連閃，嗰種快感諗起都覺爽！除咗操控蒼鬼外，遊戲中途重會加入同伴，特別之處係只要按L2就可以轉換角色同指揮同伴，玩家可下達跟隨、猛攻等指令，某些版面更要互相配合才可通過，呢個玩法擺明從《Bio0》而來。
吸魂變身鬼武者
今集主要玩法重係打怪→吸魂，而吸收嘅魂有個更實際作用，只要去到有「破魔鏡」嘅地方，就可以將身上武器或防具作強化，隨之連鬼戰術都可升級。較為少見係紫魂，只要吸收到足夠數量，就可以變身成為鬼武者，今集內除咗蒼鬼，其他幾名拍檔都有變身成鬼武者嘅能力，呢種大絕招當然留番喺對付Boss級敵人先出招，好似應付第一隻巨大幻魔兵，蒼鬼就會變身作戰，不過第一隻Boss只算係熱身，被打都唔覺痛，只要睇準避開攻擊即可，即使一招揮大刀橫掃，蒼鬼亦都捱得住，過關難度唔高。
冰火武器要儲齊
鬼戰術係通過吸收足夠藍魂發動，不過特別之處，係技能會因應手持武器而出現唔同特性，好似初期一把雷刀，1級時只係放個小閃電，似乎無乜睇頭，不過只要升到去3級，就會變成大雷擊一樣，連帶畫面都震撼好多！而武器帶有冰、火、雷等唔同屬性，令鬼戰術有別外，某啲關卡亦要利用冰火等特色才可過關。今集除咗保留激打風格外，亦加入類似RPG玩法，當玩到版圖特別位置，就會出現「鬼武俠」小遊戲，以限時內斬殺敵人為目的，成功過關重會得到道具。
攻略本同期推出
開發商強調《新鬼武者》要用成2隻DVD收錄，除咗大量CGMovie外，超壯大遊戲流程亦係主因之一，即係話爆機需時更耐，而且大量謎題及迷宮可能令新手叫苦。CAPCOMAsia今次亦推出官方攻略本，賣價$58，不過其厚度、印刷及攻略內容比之前更豐富，就算老手都值得買番本珍藏！
PROFILE
遊戲類型：動作＋解謎
對應機種：PS2
遊玩人數：1人
開發商：CAPCOM
行貨售價：$378（攻略本$58）
查詢：CAPCOMAsia（23661001）
(C)CAPCOMCO.,LTD.2006ALLRIGHTSRESERVED.
