美國係一個乜都好誇張嘅國家，德州有個叫做Hereford嘅小鎮，人口只得14600人，居民主要以畜牧為生，舊年淨係養牛嘅收入已經高達27億美金，所以呢個小鎮亦稱為「世界牛肉之都」。
不過呢個牛肉之都亦有佢獨特嘅煩惱。每日Hereford要處理嘅6300噸牛屎，以前一直由農夫畀錢由專人去將牛屎變做肥料，但始終都係搞唔惦呢啲堆積如山嘅副產品。
如果呢單嘢交畀特區偉大嘅政府，佢哋首先得出一個結論，然後召開一個專責小組，邀請幾名固體廢物專家，然後又得出一個結論︰就係香港嘅堆填區滿咗喇，要收費。
利世民唔知點收費先至可以阻止啲畜生排泄，所以香港政府嗰種諗法對牛牛應該唔適用。咁美國人又點解決呢？話說自從油價飆升，美國人將所有可以轉做燃料嘅物質都用嚟研究。結果有一間公司發現用牛屎提煉酒精，又可以做燃料，又可以做化工原料，提煉完嘅殘渣重可以做番牛食嘅飼料，可以話真正做到五穀輪回終極環保。
油價急升促進偉大發明
利世民介紹呢單料，只不過想話畀大家知，環保唔一定要政府出手，而且各位睇嘢千祈唔好睇埋一面，以為高油價係世界末日。事實上，如果大家希望環境好啲空氣清新啲，油價上升其實係好事。酒精做汽車燃料比石油產品乾淨好多，如果唔係油價急升，又點可以促成牛屎酒精呢啲偉大發明？
市場要分工廢物才環保
最重要一點，呢件事上面我哋可以睇到市場嘅精要所在，就係阿當史密夫講嘅分工合作是也！就算孫子兵法都有教落︰有得傾就傾，無得傾先砌。德州牛仔將牛屎賣畀酒精廠，酒精廠又將殘渣飼料賣畀牛仔，結果佢哋又可以賣牛肉賣酒精，重可以達到環保目的，咁複雜嘅嘢又邊度可以旨意政府高官指指點點呢？
利世民