大市在窄幅內整固，恒指收15530，升65點，成交減到239億元，2月期指收15560，高水30點。大市現時仍可視為升穿徘徊區頂部的後抽，但調整時間可能會較長，而農曆新年長假前，亦不宜揸重貨。
檢討呢兩日嘅「戰績」，周一推介嘅中國海外（688），股價重上4.0元水平，成交繼續好「墟冚」，有近3000萬股。中海噚日上落較快，主要係有大行對撼，時而掃上4元，時而質落3.875元，但收番3.975元，有0.1元進帳，亦可顯示買家較有決心。睇中海個勢，若升破4.05元阻力，目標直指4.9元，可追進。
中油（香港）（135）一度升上2.225元，但無功而還，重收2.15元，跌1個位。不過，成交就縮到只得3860多萬股，照計突破隨時會出現，只要確認升破2.2元阻力，照度上去，目標係2.6元。
百威隨時再開車
另外，噚日收到料話在高位整固已有兩個多禮拜嘅百威國際（718），好快又會再開車，今次應該會見到3字頭。百威轉型，拍住河北滄州工業集團同中國石化集團呢兩個大碼頭，日後應有脫胎換骨嘅表現。
中國內需同消費股，呢輪表現得好強勢，大行亦紛紛出報告睇好。中央鼓勵內需推動經濟政策，令整個內部消費大環境轉好，肯定對零售股有利，永恩（210）就長升長有，噚日更創出4.7元的新高，雨潤食品（1068）上周五亦高見5.5元，比兩個多月前的低位3.2元，大升72%。
中國永樂（503）近日亦急升上3.6元後才調整，噚日平收3.5元，整固完成後，可再展升浪。上月21日推介永樂，當時股價2.725元，理由係大戶經兩次震倉後，已成功將貨源歸咗邊，日後一發力，升勢會好急。果然，踏入1月份，幾下手勢，股價已由2.65元升到3.6元。
大行對中國消費市場熾熱嘅前景好有信心，所以，即使永樂急升，但睇市場動態，未見有大行趁勢沽貨，佢地睇幾多？芬佬消息話好保守計都應該見到4字頭。事實上，永樂現有分店151間，未來1年會開多90間，發展步伐甚速。
郭兆誠