早排多份報章報道話，有貴利集團請班𡃁仔淋紅油收數，引起社會嘩然。噚日李Sir向立法會講去年罪案情況，張文光就好關注呢單新聞，點知李Sir話報道唔正確，話近排無貴利集團請青少年咁做，但舊年就有一宗，張文光就批評一哥捉字蝨，指大家都明知講緊舊年治安情況，認為一哥刻意迴避問題，結果雙方就爭辯咗十幾廿分鐘。
作為一哥歡喜寃家嘅長毛亦加入戰團，問一哥近期鍾意聽啲乜嘢音樂，一哥即刻話：「貝多芬，唔想再答」，又加一句話自己誠信比任何人都好。長毛梗唔會咁易放過死對頭啦，佢話每次去警察總部搵一哥傾偈都搵唔到，一哥就話自己每朝八點返工，但長毛每次都係朝早九點後先嚟，佢可能已經出咗去做嘢，一哥叫長毛下次可以預約見佢，時時都歡迎咁話。
爆料熱線：29290000、27860099
報料傳真：26239278
報料電郵：[email protected]