代理行想前線做多啲生意，除咗用獎金利誘，就係以名聲去推動。呢個係幾大代理行成立精英會嘅原因。
利嘉閣日前舉行○六年度精英會就職禮，○五年做到百六萬生意嘅前線，以及一千萬數嘅經理，先可入會，結果有五十二個前線及五個經理攞到入會資格，人數比舊年近七十人少，原因係入場門檻提高咗。舊年嘅資格，前線係五百萬生意，經理八百萬。
入會係每年計數，鋪鋪清，但原來有兩個前線，喺精英會成立至今，連續七屆入到會，兩人係跑馬地成和道分行經理李淑玲及馬鞍山廣場分行高級客戶經理任淑華。
呢啲人辦，肯定係利嘉閣用嚟推動前線嘅最佳例子。