華華月頭講過，高官飯堂鏞記參加咗「香港服務名牌選舉」，啲員工重好落力咁為舖頭拉票，終於「得咗」，榮登十大品牌之列。
甘健成老闆噚日領獎時笑到見牙唔見眼，又話佢哋無分店，又唔係上市公司，都攞到獎，真係飲得杯落。中環人好多都熱愛鏞記，但最驚佢愈嚟愈名牌，就愈嚟愈難搵位啫。
每年年卅晚（今年就年廿九），鏞記都會喺下晝3點收爐，晚市咁好搵都唔做？因為要同班夥計食團年飯兼開Party。甘老闆話，呢個係舖頭60幾年嚟嘅傳統，今年會筵開18圍，取易發嘅意頭；除咗食九大簋之外，重會有抽獎㖭，當中唔少獎品都有人贊助，好似機票、名表、免費旅行團等等，名牌老字號果然多人支持。而甘老闆重會喺當晚向員工宣布加人工呢個好消息！
佢又話，今年個市好咗，家吓到初七嘅Booking都已經滿晒（佢哋初四啟市），每圍過萬嘅酒席都好受歡迎，唔少客重一次過訂十幾圍。雖則Booking滿瀉，但大家如果想去食燒鵝都唔係唔得，事關甘老闆留咗三成貨畀Walk-in客，出咗花紅想嚟食好嘢就請早啦！
李華華