雖然零售股已經冇去年咁好炒，但個別股份仍然有人睇好，好似先排因為出售物業錄得大筆收益，兼派0.50元特別股息的寶光實業（084），最近就有證券行幫佢秤過，發覺就算派完股息之後，公司仍然有得諗。
寶光去年12月，以8.2億元向大股東出售一幢大廈，其中3.2億元還債，另外有4.757億元就派發特別股息畀股東。經紀黃話，呢單交易，令公司負債比率大降。
另外，據講寶光旗下眼鏡88生意甚好，而時間廊盈利貢獻雖然冇以前咁多，但去年向大股東收購的精工品牌手表生意，亦提供一定盈利。
此外，寶光揸住3％新宇亨得利（3389），兩間公司據講將有所合作。新宇亨得利上市以來，因為大陸消費股受追捧，股價節節上升，寶光呢手貨升值不小，計落應該賺大錢。
新宇亨得利昨日股價又升10.2％，收2.70元，再創上市新高，成交金額3462萬元。
慕容小初