講開噚日嘅香港服務名牌頒獎禮，華華喺會上亦見到莎莎主席郭少明同太太（圖），即時諗起，莎莎會喺年廿九在慈雲山開新舖。以前銀行多過米舖，𠵱家就化妝品店多過銀行，可知一場自由行，賣化妝品幾好景。
好似郭老闆話，呢間店係佢哋第一家喺領匯商場開嘅舖，如果生意好，會繼續喺其他領匯商場開店，事關家陣租金好貴，要搵啲啱Budget嘅舖位唔易。連鎖店咁捧場，唔怪得前名分析員都話領匯值25蚊，搵「細路仔」落叠。
郭老闆又話，今個月莎莎生意比舊年多咗一成，每張單金額多咗5至6個巴仙，都算幾理想，員工都有人工加，加幾多？咪同業績睇齊囉！至於農曆年假，郭少明話會同屋企人去美國賭城玩番一個星期，返港之後先再搏殺。