煲呔搬咗入禮賓府之後，肥龍雖然唔肯搬，但係政務司司長（CS）嘅官邸維多利亞宮都要係咁意裝修吓，先至招呼得人。八方聽聞，間屋點搞全部由許太話事，所以肥龍都唔知幾時可以用得，應該趕唔切迎狗送雞。
反正煲呔今年新人事新作風，拜年都要顯示吓強政勵治，搞乜嘢綑綁式拜年，搵埋肥龍、唐唐同皇仁龍，星期日大年初一一次過喺禮賓府招呼記者。
八方同啲行家一樣，對呢個安排反應麻麻，因為過去高官分開團拜，煲呔初一、唐唐就初二，幫手填唔少版位。皆因唐唐喺拜年時會講吓預算案，或者爆吓料，但係煲呔在場焗住封嘴，而肥龍就更加可以縮骨唔講嘢。綑綁晒喺一日，對政府其實都冇着數，政府新聞都報少一日啦。不如煲呔認真諗吓，唔好將司長綑綁晒，沿用過去嘅安排算啦！
爆料熱線：29290000、27860099
報料傳真：26239278
報料電郵：[email protected]