隔晚美股回穩，昨日日股彈升288點，帶挈港股好番啲。恒指升得65點，可以話個市冇乜力，難有作為，亦可以話未升得夠，剩番啲升幅，喺雞年最後3日出現。
雞年恒指最高15816，昨日15530，相差286點，要喺3日內有呢個升幅，令雞年全年最高收市，機會唔係太大，除非日股發癲，幾百點幾百點咁升。
恒地C輪9852：恒地（012）私有化恒發（097）又再失敗，前日兩隻主角股票雙雙下跌，恒地昨日升番1.8%，恒發升番1.6%。恒發冇輪掛牌，冇輪可講。恒地有C輪9件，交投非常細。
恒地喺大隻地產股中，NAV折讓比較大，值得睇好，可以諗吓恒地軟軟哋之時，收啲C輪，9852啱睇。
隻輪8月尾夠鐘，輪價47仙，溢價3.4%，槓桿率8.4倍（有效6.3倍），引伸波幅21.3%。細細注好嘞，想大注亦唔可能，事關昨日全日成交得65萬份咁大把。
中煤C輪9524：中煤跌咗兩日，昨日彈升30仙，C輪自然生猛，升幅由12%至22%。吼回軟，揀隻C輪埋手，9524唔錯，5月下旬到期，輪價84仙，溢價1.9%，槓桿率20.1倍（有效12.9倍），引伸波幅15.3%。
章盛