每逢情人節，男生總是費煞思量搵好節目，誓要跟女友一起度過浪漫銘心的時光。如果係樂迷，今年大家唔使諗，可以選擇跟FranzFerdinand一齊勁唱勁跳。自1月起，FranzFerdinand積極拜訪各地歌迷，此次到港來勢洶洶，票價最高至$780，一樣大把Fans買，越洋電話訪問，問FranzFerdinand點解票價咁高，鼓手Paul只以一句「BelieveMe！」回應，咁係咪香港演出會特別加料先？
記者：黃若茵
全場過半係貴票
今次FranzFerdinand來港，竟然夠膽死將最貴票價賣至$780，記得當年Suede咁紅嚟香港都係$680咋嘛！細心睇座位表，過半係$780（圖中紅色部份）。1月6日開始售票，去票務處問吓售票情形，門票依然賣個滿堂紅：$480、$580剩番極少位，而$780就要坐到4樓（舞台係3樓）。數一數，3樓共22行，而4樓就16行，即係坐對台位置第38行都要畀$780；雖然話係固定座位，不過根據過往經驗，嚟得睇BandLive，相信Fans都會衝到台前棟篤企瘋狂跳！
香港票價貴過日本！
日期：1月24及25日 地點：澳洲悉尼
票價：澳幣64元及54.4元
（即港幣約370及314元）最平！
日期：2月10日 地點：日本東京
票價：6,800日圓（即港幣約457元）
日期：2月14日 地點：香港
票價：港幣780元、580元及480元 最貴！
自創另類舞
於歌曲《TheDarkOfTheMatinee》的MusicVideo中，FranzFerdinand便跳出騎呢惹笑的舞蹈，重要教大家一齊跳。問及為何要創出這些舞步，他們指無非都係想幽默啲，𠱁吓大家開心咁話。其實，只要於演唱會中唱多幾首歌，Fans就已經夠開心啦！
FranzFerdinand有乜咁威先？
咪淨係話貴，睇吓F.F.點解值咁多先：單看05年佢哋攞獎攞到手軟就值回票價啦。FranzFerdinand自04年推出第一張同名大碟以來，總銷量經已超越320萬張，如此佳績令05的獎項滾滾來，年初先於第47屆格林美音樂頒獎禮上奪得最佳搖滾樂隊獎，再獲英國樂壇最高榮譽BritAwards頒發最佳英國樂隊獎及Mercury音樂大獎，2月繼續勇奪英國音樂周報《NME》的「最佳大碟」及以歌曲《TakeMeOut》贏得「最佳歌曲」，780蚊，鍾意就抵番晒啦！
志願要你聞歌起舞
單看樂隊名字，已知他們雄心壯志，皆因奧地利大公FranzFerdinand是觸發第一次世界大戰的導火線人物，兩年來，F.F.的確闖出了名堂。初出道主音Alex已揚言要做一支「令女孩子聞歌起舞」的樂隊，從他們過往的演唱會中，可見全場男女樂迷，包括他們自己，都像穿上紅鞋跳個不停。
自1月起，FranzFerdinand帶着歌迷們最愛快歌《ThisFire》、《TakeMeOut》由澳洲開始跳到日本，再於情人節跳到香港，實行將勁歌帶遍全球。除咗快歌，第二張專輯亦有兩首抒情歌曲：《EleanorPutYourBootsOn》、《FadeTogether》兩曲與樂隊成名風格迥異，但英倫味依然很重。而阿Paul就話，這兩首歌正正是要帶給大家不同的感覺，慢歌一樣可以跳。
樂迷鍾意佢哋乜？
樂評人袁智聰
「很喜歡佢哋嘅歌帶有很重80年代的NewWave跟PostPunk的味道，同時十分琅琅上口，Melody流暢，強烈的節奏令人很有跳舞的衝動。好期待於Live中一齊跳，雖然係坐位，但點都綁唔住我哋嘅。」
獨立音樂人Ketchup
「對佢哋嘅印象係十分乾淨整齊，Image好Fashionable，同佢哋嘅音樂夾起來令成件事好完整。」
FansBigMac
「第1日早上10:00開始賣飛，就即刻打電話去訂飛，但都只係買到第10行。𠵱家已經煲緊佢哋嘅LiveDVD，到時一定要跟住跳。」
鬼妹仔FansCallie
「乜佢哋嚟咗香港咩？佢哋喺英國真係好紅，我都有睇過佢哋嘅Live，聽佢哋好High。」
FansJimmy
「好鍾意佢哋，不過香港睇騷實在太貴，外國睇只係半價左右，所以只買咗$580嘅飛。」
FansJason
「難得喜歡嘅外國樂隊嚟香港開演唱會，一定要去睇，因為以後都唔知重有冇機會。」
唱片舖：一星期賣30隻
Andy（舖頭仔）
「剛出新碟《YouCouldHaveItSoMuchBetter》時最好賣，之後就冷淡咗一陣子，近來快要開演唱會，碟又賣多咗，一個星期可賣出30多隻。因為啲人聽過新碟覺得好聽又再嚟買佢哋的第一隻碟。推介佢哋嘅DVD，只係$110已經有孖碟，好抵。」
陽仔（ZooRecords）
「以前第一隻碟最好賣，嗰時重未有好多人識得佢哋，入咗百幾隻碟個多月就賣晒。」
