資深投資總監（ChiefInvestmentOfficer）研究領匯值唔值得長期持有，佢一聲話研究吓，證券公司啲研究報告/摘要/投資備忘錄就湧到嚟，經紀爭相畀料。綜合各方意見，有人話領匯將來值二十五蚊一個單位（領匯係REIT地產信託投資基金，唔係股票）。CIO食飯時問吓我哋呢班業餘投資人士（即係散戶嘅代名詞）嘅意見，老友記散戶T立即反對，認為現在市價（十五蚊左右）已經到價，比上市價九元七角八仙（散戶優惠價）升咗五十三巴仙，升得太快，孳息率大幅度降低，唔值噃。
財務L就認為領匯未來市值視乎可唔可以加租，領匯管理層會唔會勵精圖治，摒棄公務員嘅做又三十六，唔做又三十六嘅作風，改善效率，節約成本。
投資W就信賴細路仔基金，佢話：「TCI揸重貨，睇怕會向管理層施壓力，逼佢哋做好啲嘅，佢哋冇理由長揸一隻低yield地產信託投資基金嘅啫，必有後着，信佢哋就可以持有領匯，重要買多啲。」
講嚟講去，長揸領匯睇二十五蚊只有兩個理由：（一）領匯管理做得好好，（二）領匯可以重組租戶，最初加租十五至二十五巴仙，之後追上市場租值。佢哋問左丁山有乜意見，左丁山就認為領匯唔係純粹投資問題，其中有政治風險，未必如細路仔基金諗得咁容易，基金固然可以向管理層施壓，但鄭大班、長毛等亦同樣可以施展政治壓力，阻延領匯加租，如果萬一嗰個TheLinkWatch（領匯監察）發動租戶抗議行動，點算？領匯雖然話已經係私人公司，但好多樣嘢要房委會合作，咁即係曾特首仍然可以發揮影響力啦，佢嘅職業係「政治家」噃，政治家重視七十分嘅民望多啲還是上市公司嘅股東利益多啲？你諗嘞。鄭明訓主席，蘇慶和總裁會唔會唔聽特首與孫局長嘅電話勸告呀！投資W認為有理，但堅持蘇慶和係有計之人，可以度得掂，佢話聽到一則幽默笑話，唔知真定假，蘇總想訂一批平手錶（watch）上刻TheLink，一睇就知係「領匯表」（TheLinkWatch），用來做商場贈品喎！