卿姐爆咗單勁料，就係○四年初老董政府曾經想搵有新左王之稱嘅黃應士接替朱培慶做廣播處處長；政府噚日話唔評論「陰謀論」，呢類顧左右而言他嘅答案，即係迴避問題喇。係咪唔敢否認呢？
卿姐噚日同八方講得言之鑿鑿。又係喎，○三年七月五十萬港人上街之後，北京乜都做得出，包括閂咗大班、飛哥同毓民三支咪，港台點可完全置身事外，唔使畀人郁？當然後來冇成事，唔怪得八方呢幾年見到朱處長，佢都係有啲若有所思，冇乜笑容。
朱培慶喺張大姐被調日本後臨危受命，都知道份工唔好做，大姐走係因為政治不正確，唔肯聽徐四民以及班土共嘅指揮，老朱已盡量遷就，都避無可避，所以佢老哥雖然○八年先夠鐘退休，但係已有晒心理準備，隨時起身唔撈。
老董冇完成嘅任務，由煲呔接手，上周終於任命咗喺九八年已經取得銀紫荊星章嘅黃應士做公共廣播服務檢討委員會嘅主席，成員六人，冇一個同港台有親，大家都差唔多可以預見九個月後個報告會有乜嘢結論：一句講晒就係叫港台收聲，一方面唔好同已經聽話嘅商台爭利；另一方面就係要做好口舌，為政府塗脂抹粉。
所以噚晚港台舉行第二十八屆十大中文金曲頒獎音樂會前，班行家就追住阿處長問今屆係咪最後一屆？朱Sir都好幽默，話今屆金曲嘅口號係「給音樂生命」，金曲咁有生命力，為乜要叫停？眾人媽打李麗娟亦幫口，話每年都嚟捧場，除非唔喺香港。佢重話金曲頒獎禮唔同賽馬，係公平、公開同公正，冇理由唔繼續。媽打講得輕鬆，舊年朱Sir就面對三個揀一個斬嘅噩夢，最後佢力保金曲同股經，犧牲咗賽馬。
新左王帶隊上立會
其實政府成日諗換人有鬼用咩，正如朱培慶講，港台𠵱家係集體領導，郁一個人未必有改變。朱Sir講得啱，所以今次黃應士係有備而來，唔係點解二十年都唔肯檢討，忽然咁好死。新左王聽日會同五個委員包括梁天偉同包雲龍上立法會資訊科技委員會，睇吓啲議員問到啲乜嘢，朱Sir暫時唔蒲頭，由副處長吳錫輝打頭陣，打一場必敗之戰。
爆料熱線：29290000、27860099
報料傳真：26239278
報料電郵：[email protected]