江湖傳聞，曾蔭權有一份炒魷名單，幾個惹火局長都在名單頭位，等住搶閘。當炒大熱，唔使畫公仔畫出腸。臨炒前，燶味甚重的局長，自己知自己事，明知玩唔長，不如一拍兩散，一於又試一身黑衣去求籤，還半開玩笑地，笑言替特區領導人順手求埋籤。唉，黑衣局長已經有過「黑仔前科」，手氣每年都麻麻，狗年大運，肯定輪唔到佢。將「黑氣」過手給老頂曾公，算是回應了熱炒的必然宿命，臨尾都反撐一腳掃郎腿，算是為自己扳平。調查不是說，男人的報復心，比女性要強得多嗎？
篤信天主的曾特首，有梵蒂岡照住，大概不怕車公大仙的下下籤，可以當他冇到，繼續請高人擺布錦鯉魚池，擋開禮賓府的天九煞就得了。風水包袱一甩，曾公用人炒人都零舍爽手，絕不重蹈老董亂軍兵敗如山的覆轍。破格用人的代表作，是委任傳媒老叔父黃公，整治港台。黃公一開腔就是「假假地在傳媒四十九年」，年資大晒冷，擺明跟新仔鬥長命。假使是鬥食比賽，唔使問，黃公肯定是食鹽冠軍，食米的後輩，只有聽佢老點。不過黃公03年「出征」伊戰，成套防毒豬嘴武裝在美軍營地做現場報道，笑死行家，成為開埠以來，最大的新聞界棟篤笑話。曾特首無視笑柄，委以「開刀」重任，對港台「施手術」救亡在明，在暗則相反，是要切斷大動脈，達至放血失救效果。從黃公面對傳媒的幾次發言，當可知道，曾特首是找對了人。用人炒人部署有度，以前罵過曾蔭權是狗官的市民，應該收番。狗會咬人，角色調動後，指派狗去咬人，也不容易啊。