美股上周五大跌逾二百點，港股噚日照跟，全日跌197點，收15464，成交290.08億元。恒基發展（097）及恒地（012）果然出現套戥基金拆倉情況，早前買入恒發沽空恒地的基金，噚日沽出恒發，同時平埋恒地空倉，結果恒地只跌1.15%至38.65元，跌幅小於地產分類指數的1.45%，成交逾10億元。而恒發則大跌16.61%至12.80元，成交高達3.9億元。
恒發未跌完
里昂統計過，自公布恒發私有化至私有化告吹期間，恒地累計沽空約為5000萬股，噚日成交只得2750萬股，似乎恒地股價短期仍有補倉盤支持。至於恒發，噚日曾大跌近20%，低見12.35元，但看來仍未見底，或要下試11元水平。
宜進利（304）配售9000萬股，每股3.25元，抽水2.93億元。阿虎先前擔心宜進利會好消息出貨，但宜進利配股通告完全無提到引入國際零售企業一事，結果係大戶冇好消息一樣出貨，宜進利股價一度被質至配股價水平，中途重停埋牌，停牌前報3.275元，大跌9%。公司表示有一些配股事宜要澄清。唔知係咪同承配人身份有關？但以現時市場氣氛之惡劣，相信難以力挽狂瀾。
華彩（8161）變身成為內地彩票股，斥巨資收購彩票資訊科技業務。德銀及花旗將佢納入研究範圍，德銀早前更幫華彩配股抽水。此外，有資料顯示，份量十足的富達亦持有華彩逾5%股權，華彩已成為基金股。
華彩早前曾升至4.20元，升近花旗目標價4.30元，花旗即叫客出貨獲利，令華彩出現沽壓，噚日跌破配股價3.675元，收報3.475元。華彩現價距花旗目標價有逾17%上升空間，唔知花旗會否回心轉意叫客買番？
不過，黑客就睇淡，話隻股好大機會跌至3.175元，補番早前個上升裂口。
阿虎