經常聽到人講話打開英式大枱桌球嘅轉打美式細枱實掂啦，咁大張枱都入到波，細枱重唔係嘢嘢響袋？事實證明，英式桌球唔知六次定七次世界冠軍戴維斯，因為年紀大眼水唔多夠，以為轉打細枱有着數，點知浮浮沉沉一輪都冇乜大作為，反而最近畀心機打番大枱有啲睇頭，同最近大熱嘅中國桌球神童丁俊暉交手，打了幾場燦爛的球賽。
大枱同細枱，看似雷同，其實截然不同，無論在思考上與技術上都大有分別，尤其是在於如何去「贏」的攻略，是兩種不同的思維。打枱波也可悟人生道理，無論打大細枱都非常講究「拆」字訣，有時枱波會聚埋一堆，冇位打，冇波入，形成一個困局，這個時候便需要心思細密的閱讀球賽能力，配合得心應手久經訓練的技巧去拆波，只要拆得其法，局面會豁然開朗，英國桌球名將奧蘇利雲便是箇中能手。
對手往往以為已將他逼入了困局，只能選擇打安全波自救，但奧蘇利雲環枱慢走一遭，腦中不斷模擬出不同擊球位置所產生的不同效果，最後會選擇一個出奇的拆波點，扭轉了整局形勢，強弱對調，像《天龍八部》中虛竹在圍棋對弈中誤打誤撞在死位下子一樣，化死局為路路暢通。無謂等運到博誤打誤撞，「拆」字訣是有得練的，人生路上何其多事需要去拆，恁是任何困局，照拆可也！