渣打集團入咗股嘅天津渤海銀行，據聞初步訂於下月18號正式開幕，天津市首間分行亦同步啟業。渤海係中國銀監會批准新成立嘅銀行，銀監主席劉明康自然畀面，前人行行長兼現任天津市市長戴相龍亦會出席，渣打第一次入股內地銀行，當然亦隆而重之，聽講集團主席桑德森、亞洲區副主席陳德霖、渣打香港行政總裁蘇利民等，亦會齊齊赴天津出席。
早前有統計話香港大企業高層男多女少，華華噚日去渣打食飯，蘇利民話，渣打香港高層組成嘅行政委員會，入面五成係土生土長嘅中國人，女性亦佔四成，可見渣打管理層非常本地化，男女組合亦好平均，國籍多元化就更不在話下。總之，都係想話畀大家知佢哋冇歧視啫。