《資本》雜誌噚晚喺中環麗嘉開Party，頒發17個傑出企業成就獎，表揚吓唔同界別嘅企業。呢類「分豬肉」活動，最困難係搵到夠班嘅人嚟攞獎，但主辦單位又幾掂，得獎嘅機構有番咁上下（例如滙豐花旗余仁生），重搵到自由黨田北俊、中信泰富范鴻齡，同埋人大代表李鵬飛嚟主禮，咁場面就熱鬧好多，又有聯通盧永仁、文傳陳自創、中華總商會胡經昌、工業總會邱繼龍等畀面做頒獎嘉賓，得獎單位代表都好高興。
可能就快放農曆年假，到場嘅人都特別輕鬆，話題離唔開放假去邊度Wet。飛哥揀咗去馬來西亞，盧博士就會同往年一樣，約埋張堅庭等人去東京滑雪。行會新貴范鴻齡就話過年會同老婆去曼谷唞吓，佢會做吓Gym，至於老婆就應該會Shopping同做Spa。
見到范鴻齡，華華又點會唔問佢阿妹羅范椒芬嘅近況呢？范鴻齡話佢成日都有同妹妹見面及傾電話，唔覺對方意興闌珊，亦唔覺佢有乜異樣，又話佢係一個積極嘅人，唔會遇到困難就放棄，對於妹妹「失言」，佢就話最緊要係「問心無愧，處之泰然」；果然兄妹情深。
李華華