日股跌336點，港股跌197點，算係合理。重磅股例牌影響恒指較多，中移動（941）與滙控（005），1隻跌0.85元，1隻跌1.30元，總共拉低恒指103點，包咗恒指總跌幅1半。
大市未見恐慌性拋售，跌股係升股嘅2.3倍，人心仍然穩定。睇吓美股點走，美股如果定得住，雞年最後幾日，重有機會彈番上去，股民過年唔使閉翳。
中移動C輪9663：中移動05年尾最低36.40元，昨日最低37.15元，收37.25元，估計上次低位守得住，甚至唔使再試上次低位。芬佬要搞氣氛，中移動亦係好好嘅對象，臨場執生，低位買啲中移動C輪博反彈。
正路對象係9663，買賣節奏明快，贏輸要計數亦快。隻輪4月尾夠鐘，輪價21.9仙，溢價7.9%，槓桿率17倍（有效8.6倍），引伸波幅31.8%。想更爆炸，則賭9417，呢隻上落更快，波幅更大。
滙控C輪3400：滙控C輪槓桿率普遍唔細，所以殺傷力同爆炸力好勁，贏輸20%等閒事。滙控咪睇得咁淡，有機會低位博C輪，3400係搏殺對象之一，溢價相當吸引，做得好，一日可以炒兩三轉。
唔想咁搏殺，則向有輕微負溢價嘅4907埋手。
章盛