港股噚日跌市，恒指最低之時曾大跌250點，收15464，跌197點，期指則低水37點。港股暫時仍會受外圍走勢影響，加上未來3日大戶轉期指倉，市勢料仍會大幅波動。
大市雖跌，市場氣氛卻唔算太差，上升股（不計認股證）仍超過200隻，顯示質優同消息股繼續有資金追捧，炒股唔炒市呢個大趨勢，相信會維持一段頗長時間。
中資股個勢仍然最勁，H股指數收6071，只跌26點，逆市而升的有中國人壽（2628）、交通銀行（3328）、平安保險（2318）、江西銅業（358）同中油（香港）（135）等。華潤置地（1109）以每股3.725元配售3億股，低見3.70元後即穩步回升，上番4元收市，僅跌5仙。「披成」股在大跌市中而有咁強勢表現，理由只有一個，就係「披成」嘅貨源九成九俾基金食晒，佢哋呢個位重大手要貨，睇幾多？
油價再向高位推進，中油股價應聲彈起，高收2.175元，升0.1元，升幅4.8%。兩個禮拜前，以「中油目標2.3元」為題作推介，當時股價1.81元，噚日最高2.20元，全日成交超過8000萬股，動力顯然仍好強。
預測PE僅7.7倍
今日再講中油，主要係收到中資來料，話中油有料到，農曆新年過後，股價就會有一番新景象，而且幅度唔會細，話唔定會見到3字頭。
睇走勢，中油真係好靚，月中升穿長達5個月的大型複式頭肩底形態後，衝上2.20元才出現整固，家吓形成上升旗形，一升破2.20阻力，照度上去，目標係2.60元。
中石油（857）剛宣布05年度（12月年結）的營運數據，全年平均實現油價係48.8美元，中油05年上半年平均實現油價36.85美元，估計全年可逾42美元（通常比中石油為低），油價每上升1%，中油盈利可上升5.8%，估計中油05年每股盈利0.28元，預測PE只係7.7倍。
中油係中石油的兄弟公司，大股東中石油集團持有52.55%權益，中油同中石油「晒士」唔同，但業務性質相同，若有有心人要解決架構重叠問題，則出現併購及私有的行動，將不會令人感到意外。中資睇3元樓上，莫非……真係……？
郭兆誠