石禮謙講紅酒唔受煲呔玩 - 李八方

  石禮謙講紅酒唔受煲呔玩 - 李八方

煲呔早前開咗支八二年Lafite同金勞詹歎,搞到好多政界中人都好眼紅,覺得煲呔禮待金勞詹喎。
之不過呢,歎紅酒呢家嘢,唔係貴價就好味,反而同邊個飲,搵邊個做酒伴重緊要。石禮謙Abraham好坦白咁話,講飲紅酒,都係同三個猛男司局長,包括唐唐、肥馬同葉Sir飲先係真正享受,因為佢哋三個一歎酒就好輕鬆,就算係邊摸酒杯底邊談正經嘢,都唔會好似煲呔咁硬邦邦。言下之意即係話同煲呔飲紅酒,都唔係好矜貴咋喎。
呢期泛聯盟組黨新聞滿天飛,Abraham就猛話做緊研究咋,至少三至五個月後先成事,冇咁快搞掂。不過,Abraham就大大聲話,如果要組黨,唔擔心冇人,重係「大把貨」嗰隻,單單何鍾泰個工程師學會,就有成三百幾人,如果都入黨,就冇有怕。
佢重話,組黨主要目標唔係直選,反而係培訓多啲人畀政府委任,真係同大方向背道而馳,唔通專業界別真係覺得委任制好到唔使取消?


爆料熱線:29290000、27860099
報料傳真:26239278
報料電郵:[email protected]