利是，內涵（銀碼）固然重要，但亦要講包裝（利是封），內外兼備，𢭃利是者自然雙倍開心。別以為利是封只得紅包金字玩不出花樣，每年拆呀拆呀，都發現有新花款，今年亦不例外，不過適逢狗年，一於揀番隻狗仔應年。
記者：招佩珊
攝影：陳智良、林栢鈞、譚盈傑
狗仔提供：DogOneLife（31055912）銅鑼灣駱克道459號
當紅利是封 封面放狗
正因為來年是狗年，以狗仔作封面的利是封亦順理成章成為當紅之選；派利是畀小朋友，最好揀卡通狗，款式包括紅足N年的史諾比、肥嘟嘟的布甸狗，還有難得今年有機會紅過其主角的布魯托，實𠱁到小朋友開心。
2.燙金金狗$10/8個（b）
紅包金字是利是封的基本款式，燙金狗仔圖案份外貴氣，但再等12年都用唔番，皆因印上2006只限今年用。
3.布魯托上位$6.9/8個（c）
迪士尼一直以米奇同米妮做主角，來年適逢狗年，米奇的寵物「布魯托」終於可以威番一次。
4.經典史諾比狗$7/8個（d）
史諾比是眾多卡通狗中最受歡迎的一隻，尤其是快餐店同便利店，最鍾意搵佢引大家落叠。
5.和服布甸狗$9/8個（d）
Sanrio家族成員之一，唔知會唔會藉狗年成功上位，紅過Kitty？
精選紅封包
每年利是封款式花樣百出，傳統紅噹噹同金燦燦的款式固然走唔甩，又加布、又加繩結，重可變繞飾，各具特色，家陣利是封唔止一張紅紙咁簡單。
6.二合一變掛飾$12.9/個（a）
利是封貼於金元寶內，而拉開孖公仔LittleTwinsStar，會變成一串印上「新年進步」的掛飾，同款設計還有Kitty、大口仔、布甸狗及MyMelody俾你揀。
7.金裝多啦A夢$5.9/6個（a）
有人鍾情於金色利是封，派金收金兩者同樣開心，今回用上多啦A夢大頭做封面，Cute味十足唔老套。
8.財神到$9/2個（d）
閃令令紅色封套Sharp到震，但搶眼度不及剪裁精細的財神，況且接財神，有邊個唔想？封身夠長省卻摺銀紙的工夫。
9.如意結封口$22/10個（e）
一般利是封以自動黏貼作封口，但呢款利是封則用中國式的如意扣，加上有如玉墜的膠鈕作為封口，極富中國色彩，唔似黏貼用一次就無，可循環再用。
10.織錦布點綴$18/10個（e）
封身貼上中國味重的織錦花布，設計夠特別，摸上有質感，比紙質利是封更顯矜貴，織錦花布款式有龍及花卉揀。
11.中式凹凸花$4/4個（c）
圖案較傳統的利是封，而封面的兩盞彩燈則做卡紙另行貼上，營造凹凸效果，令平板的利是封變得不平凡。
12.麥兜/阿輝冧Fans各$12/8個（f）
但凡大時大節麥嘜麥兜定必有產品應節，今年的利是封由麥兜同阿輝擔當主角，手執金元寶的阿輝祝大家新年進步，撐住條魚的麥兜賀各位如意吉祥。
商場多狗作
狗年將至，各大商場不惜工本大送設計別出心裁的利是封，𠱁大家在商場消費滿指定金額換購。重要嘅係夠樣靚，甚至乎比街買嘅重得，是以不少已換罄！
apm迷彩潮狗
Figure設計師EricSo設計的「06潮狗利是封」，粉紅迷彩圖案加金狗，潮！
重有得換呀：即日起至1月28日於apm購物消費滿$500或以上，憑即日單一機印發票，即可獲「06潮狗利是封」一份。數量有限送完即止。
查詢：22670500
望梅止渴
售賣點
（a）吉之島（28846888）鰂魚涌康山道2號康怡廣場（南座）地下至3樓
（b）崇光百貨－銅鑼灣店（28338338）銅鑼灣軒尼詩道555號
（c）裕華國貨（23840084）佐敦彌敦道301-309號
（d）商務印書館（27708881）佐敦佐敦道13號華豐大廈地下
（e）city'super（25062888）銅鑼灣時代廣場地庫B1
（f）春田花花幼稚園（28915211）灣仔活道24號地下