每年年頭，樂壇排住隊搞頒獎典禮，地產界近年都跟風，搞娛樂性豐富嘅頒獎禮。例如長實，噚日大搞銷售獎，實行向四間代理「分豬肉」：中原攞金額獎；美聯宗數獎；港置速度獎；利嘉閣攞嘅，就叫做最高平均成交金額大獎，總之人人有份，旨在開心。
主持頒獎嘅執董趙國雄，當然捉緊呢個出位機會，扮鬼扮馬。噚日以一身蒙古國大汗裝扮外，重用彎弓射箭姿勢出場，博得全場大笑。
其餘經理各有主題造型，維妙維肖，好似負責賣大坑名門嘅黃思聰及梁婉君，一身貴婦紳士打扮；地鐵上蓋將軍澳都會駅，負責嘅郭子威，就一身車長裝束，創意無限，成個頒獎禮充滿笑彈。
中原更送上印有卡通肖像嘅心意卡，向大家拜個早年。