與其說「廚師」是間餐廳，倒不如叫它作小食外賣站，全店只得4個座位，多張麻雀枱都放唔落，心想無裝修、無服務、價錢又唔係特別平過人，如此惡劣環境居然重有人排隊等食？原來街坊撐場的，是日賣只得8隻的海南雞，小記試過，又確實抵撐。
記者：羅灝汶
攝影：陳盛臣
模特兒：Key（RTHKTeenpower）、Imageboys&girls（Salvadors）
小店真功夫
贊師傅本身移民加拿大，其在加國主理星馬菜館「翠園」的恩師在港開了這間「廚師」餐廳，因患嚴重腳疾萌結束生意念頭，但因食客努力挽留，故任命他接棒生意。因全店只得他一位廚師，座位又只得4個，故每日午晚市爆場時段，食客都會透過開放式廚房與他搭訕，贊師傅亦愛與客人打牙骹：「我啲星馬菜唔落味精，少油少鹽，全店禁煙，歡迎討論煮食之道。」見他與客人指手畫腳的談個不亦樂乎，感覺就好似日本的街頭麵檔：「加拿大同日本啲食店鍾意咁樣經營，同客人做朋友好過癮。」
清熱排毒喇沙葉
喇沙湯底因含喇沙葉而命名，喇沙其實是種軟莖土生的常綠草本植物，學名「DaunKesom」，味甘澀香濃，有清熱涼血排毒等功效，贊師傅：「喇沙葉莖部最有益，不過指甲咁細嘅花蕾先係精粹，嗰種香味一聞難忘。」
A海南雞飯每客$36
招牌菜，贊師傅每日只會浸製8隻3斤重的黃油雞，每隻雞開4份總共32碟，食到雞胸定全髀睇彩數。雞肉嫩滑得直入喉嚨，油飯由老南薑、香茅、大蒜、葱頭、椰奶、鮮雞油等等材料煮成，醬汁與葱油自製，好味到爆。
B黑椒牛仔扒喇沙$46
真正喇沙葉做喇沙湯底，絕非混水摸魚的一般辣油湯底，特色是香、滑、濃，香源自天然椰醬及喇沙葉、滑因為有吉隆坡咖喱香料醬與新鮮葱茸滲出的天然菜汁、濃源自那10斤豬骨加10隻鮮雞熬的湯。
C馬來肉骨茶配白飯$38
贊師傅曾於加拿大及浸會大學修讀中醫，肉骨茶所用藥材經過悉心調校，既不失傳統味道，亦體貼到香港人虛不受補的體質。
D黑椒羊仔扒配咖喱汁$68
每碟6支羊架，贊師傅用吉隆坡紅咖喱配方煮成咖喱汁，香而不辣也不油膩，芳香溫和大人細路都啱食。
食客有Say
廚師（28062683）
座位：4個
地址：北角天后電器道63號B
營業時間：12:00nn-3:00pm，5:30pm-10:30pm，逢周一中午時段休息
