一個經濟體系係唔係健康，最緊要唔係睇增長有幾多通脹有幾低。一個健康嘅經濟體系，最重要係創業活動夠唔夠活躍。如果一個經濟體系無人創業，呢個地方就一定慢慢失去競爭力，其他問題就跟着出現。
如果有留意香港經濟發展史嘅朋友，就會發覺到香港人嘅創業活動，喺80年代中漸漸減退，取而代之係全民皆炒。當然如果炒作好搵過做生意，咁又點會有人創業？但其實炒作嘅錢永遠都係冤枉嚟瘟疫去，如果睇數據就會發現香港地身家過億者，大多數都係有實業背景，純粹靠炒作發迹者為數其實不多。
究竟80年代中發生過乜嘢事，令到香港經濟模式出現根本改變？喺開古之前，利世民想先解釋一下創業係乜嘢？創業嘅人永遠都係搵到市場冇嘅服務同產品，如果消費者受落再加上管理得宜，咁就係成功創業。毫無疑問，香港人無論喺開拓市場同管理上都經驗豐富，照道理當經驗累積，創業活動只會愈來愈多，究竟重欠缺邊啲因素令到香港人嘅創業意欲大減呢？
四會合一從此斷水龍
1986年3月香港四間交易所合併，股市亦變成幾間大孖沙嘅樂園。記得70、80年代，英資老牌俾華資財團逐一狙擊，呢種事情喺四會合一之後就唔再可能發生。四會合一亦令到資本市場被壟斷，中小型挑戰者亦都冇可能從股市集資。所以自從80年代一班華資上台之後佢哋就慢慢開始老樹盤根，將香港唔同行業逐一壟斷。
曾經有調查指出，香港人創業意欲低，其中一個最主要原因係缺乏資金。香港人有一個解唔開嘅結，就係以為創業嘅人首先需要好有錢，所以除非老竇大把，如果唔係就注定一世冇可能創業。事實上，呢個諗法60、70年代一啲都唔盛行，當時嘅人相信「工字不出頭」。
事實上，過去十幾年普遍香港人都唔再認為自己有可能發達，但係同時又見到幾大家族嘅財富以幾何級數上升，正正係呢個心態，令到本來善良嘅香港人都變得憎人富貴，亦畀政客有機可乘大打民粹牌。利世民希望各大富豪要明白，寧願畀對手喺市場打敗，都好過畀人以政治力量擊倒。香港已經到咗唔變唔得嘅地步，繼續容許港交所壟斷市場，等於阻人發達，激發矛盾，呢個罪名邊個孭得起呢？
利世民