九龍灣麗晶花園多年嚟都係二手交投最活躍嘅居屋屋苑，吸引投資者炒賣，但舊年只能以9宗屈居亞軍，冠軍寶座由10宗嘅藍田康華苑奪得；不過以總值計，麗晶達1050萬，壓倒康華苑嘅940萬。
但講到獲利幅度全部由新界居屋包辦。榜首係大埔居屋頌雅苑B座低層17室，投資者持貨165日，以90萬摸出，唔夠半年賺咗五成三，成為賺幅最多嘅成交。第二位大埔明雅苑A座中層12室，成交價同樣係90萬，升幅近四成一，但個炒家只係揸咗7日，眼光夠晒獨到。
中原黃良昇表示，舊年共錄得137宗二手居屋摸貨登記，比04年多1.4倍，連續4年上升；總值1.46億，勁升兩倍，創8年新高，反映居屋市場投氣氛濃厚。不過，摸貨比例得1.6%，比97年高峯期嘅7.5%重差好遠，顯示市場仍然係健康發展。
50年樓呎價過萬
另外，除咗居屋，同樣冷門嘅的舊樓亦有動靜。向來唔係咁多人鍾意買高齡樓，一來按揭成數唔高，二來維修麻煩，三來梗係覺得升值潛力低啦。但凡事有例外，屋之島董事總經理歐志康表示，山頂加列山道九號一個低層單位，望香港仔同南區海景，約2500呎，剛以約2600萬易手，呎價1.04萬。
逾50年樓都可以賣到過萬蚊一呎已經唔簡單；更犀利係原業主01年6月用1400萬買番嚟，揸四年半足足賺咗1200萬，升值八成六。聽完係咪覺得香港樓市神話重未破滅呢？
電郵地址：[email protected]