李連杰噚日出席喺觀塘apm舉行嘅「霍元甲丙戌年武術賀歲暨尋找少年霍元甲」活動，現場有五位少年比賽武術，由李連杰、徐小明、劉坤銘等做評判，李連杰喺欣賞佢哋比賽嗰陣，投入到不時大拍手掌，重讚香港武術發展得好快。
談仔女相處之道
問李連杰會唔會親自教授女兒武術？佢話女仔通常鍾意學琴、跳舞同畫畫，所以冇打算要個女學武，重強調父母同仔女相處之道，係唔可以強迫佢哋做父母鍾意嘅事，佢用普通話講：「我們不能要孩子達到父母想要求的事，應由他們自由決定，如果相迫，就會有代溝，所以我從來沒有要求女兒要做甚麼事情。」
篤信佛教嘅李連杰噚日戴咗一串蜜蠟頸鏈，原來此串頸鏈價值不菲，佢又以廣東話夾雜普通話講話：「我有千幾串珠鏈，但這一串頸珠千年歷史，我在中東及西藏親自挑選，係靚嘢，最重要係海嘯之前有幾十個師父為我串鏈加持，祝福及鼓勵我做善事。」
