小初本來諗住今個星期期指結算，大市點都會有一定支持，但美股上周五突然急跌，今日港股難免受到影響，寄望H股及紅籌繼續企硬，支撐住大市的投資氣氛。
上個周末，小初同經紀黃打牌，佢提起奕達國際（2662）。隻股臨上市之前被日本前僱員告官追討股權。奕達受訴訟消息拖累，上市首日即告潛水。如今單官司終於雨過天青，對方撤回訴訟，而奕達就話考慮索償。投資者一旦重拾信心，奕達股價有望浮上水面。
奕達喺去年12月，以2.30元招股集資，當時一來新股隻隻熱炒，二來據講芬佬幾睇好奕達前景，因此貨源相當搶手，差啲唔夠分，可惜臨掛牌前，爆咗單追討股權官司，股價表現難免受影響，最低跌至2.05元。呢種情況在當時新股熱潮中甚為罕見。
聽講奕達保母至今仍然坐住唔少貨，無論為人為己，估計點都唔會放手任由股價繼續潛水，所以值得留意。
奕達上周五股價跌2.22％，收報2.20元。
慕容小初