西九究竟點搞法，真係得煲呔同肥龍知，尤其最近都好多風聲，有人話肥龍同人爆料，話個西九管理局一定搞唔切，不如退而求其次，整兩個非法定組織，一個畀文化界，另一個畀規劃界，重希望同政府意見不合嘅西九聯席，都可以畀半數成員名佢哋委任。
不過，世界邊有咁大隻蛤乸隨街跳？西九聯席都好醒目，噚日同一眾規劃師同建築師代表開咗四個鐘會，決定唔上肥龍當，齊齊否決呢個建議，事關一交人名畀政府，即係授權你官商勾結，甚至商商勾結，西九聯席又點可以咁做？
西九聯席發言人梁文道同八方講，西九好早叫停三揀一模式，叫政府從速再規劃，但偏偏政府唔肯做，只諗埋啲蠱惑招，認真激氣。
八方又聽聞，其中一個小組阿頭已內定係振英哥，呢個名一出，嚇到規劃建築啲人走夾唔唞，政府真係要再諗諗喇。
傳真︰2623-9278
電郵︰[email protected]