急景殘年，美股整鋪散二百幾點，今朝港股想唔殘都唔得，恒指如果只跌100點，好友已經飲得杯落，只不過恐怕要跌2百點以上，先至能夠止咳。
要做嘢，早段沽C輪，難有好價。買P輪，則要裂口高價上車，到咗下晝可能個市收復少少失地，朝早買嘅P輪又變成蟹貨。不如稍為靜觀其變，又或者等跌幅大到咁上下，例如去到二三百點，喺低位買C輪博反彈。
恒指C輪9639：揀恒指短期C輪，向9639埋手。隻輪3月尾夠鐘，輪價15.3仙，溢價2.9%，槓桿率25.6倍（有效14.4倍），引伸波幅19.9%。
假設恒指散200點，則隻輪估計會落到12.5仙。恒指如果跌300點，則隻輪會低見11.2仙。喺乜水位上車，伺機行事，臨場執生。隻輪街貨非常少，輪價變化未必十足跟貼恒指。
恒指C輪4471：揀恒指較遠期C輪，向4471埋手。隻輪7月尾到期，輪價19.7仙，溢價6.4%，槓桿率23.4倍，（有效10.8倍），引伸波幅18.7%。
4471較遠期，波幅較9639細啲。賭4471，贏輸都比賭9639細啲。可考慮喺16.4仙以下買貨，博大市反彈。
章盛