打扮時髦的李彩華（阿Rain）愛懷舊，還儲了不少值得紀念的珍藏品，所以費煞思量才能挑選五件至愛寶貝。阿Rain認為這五件寶貝雖然不太值錢，不過每件都是陪着她成長的，尤其是小學畢業的紀念冊，當中有不少是師長和同學對她的真摯鼓勵，意義重大。阿Rain視這些物品為家傳之寶，打算一代傳一代。
搵快錢手提電話
「當年我做parttime模特兒，因為好需要同人聯絡，加上嗰時好興呢款手機，唔平㗎，都千幾蚊，我用賺外快儲埋嘅錢買，主要方便約時間開工，同埋畀媽咪同我聯絡，咁佢會放心啲。手機度重貼咗好多我同朋友影嘅貼紙相。」
小學畢業紀念冊
「呢本米奇老鼠紀念冊係小學畢業前買嘅，裏邊留低咗小學同學同老師當年對我嘅評價同鼓勵說話，代表咗我哋嘅珍貴友情同師生情，係一個美好回憶。其實同好多小學同學已經失去聯絡，對佢哋嘅記憶變得模糊，不過每次睇番佢哋當年寫畀我嘅每一句說話，我都覺得好難忘、好溫暖。」
玩ICQ處女碟
「我幾年前初出道嘅處女唱片《Rain85013620》，嗰時唱片公司幫我開咗個ICQ號碼，係畀fans同我傾偈，重用埋個號碼做碟名。我有試過同fans溝通，但係後來工作好忙，都冇時間上網。𠵱家都唔興ICQ，個冧把都廢咗。」
好友合照約重聚
「中四嗰年我去咗一個同學屋企嘅天台燒烤，大家重好開心一齊睇煙花滙演，有同學趁放緊煙花時幫我哋影張大合照。之後一人曬一張相留念，重講好五十年後再聚會。每次睇番呢張相，我都覺得好有意思。」
初戀朱義盛戒指
「中學時隔籬班有個男仔追我，佢收到料知我好鍾意食牛奶妹糖，為咗𠱁我開心，佢食晒一盒牛奶妹糖，然後將隻好閃嘅朱義盛戒指放喺盒度送畀我，我收到好感動，重即時戴咗隻戒指。不過呢段puppylove只係維持咗一個月就玩完。」
採訪：比華利 攝影：陳志嵐
髮型：Daniel＠HipHairCulture
化妝：OmixB 場地：漢京樓
