我喜歡蒲波樓，因為那裏聚集了志趣相投的人，像球場上的球迷，投注站內的馬迷，大家就算三唔識七都可以談上幾句，遇上吹得幾嘴的更可吹水吹個沒完沒了。打枱波需要腦力與體力協調，所以是一項運動，遇上好對手集中精神打一場枱波，有助紓緩生活壓力，跟老友邊聊邊打，增進感情之餘又唔會太齋，生津解渴。
打開大枱，即是英式桌球，但唔知係咪因為大家越嚟越冇耐性，越嚟越講求即食效率，於是大枱波樓越嚟越少，一向打開大枱嘅波友亦紛紛轉打細枱，即是美式桌球。英式桌球枱大袋窄，就算係識打嘅打一場都起碼要半個鐘頭，若然遇上海軍鬥水兵的水鬥水，打個零鐘頭閒閒哋，現今世界乜都講快，難怪大枱少人打，大枱像足球比賽，有時九十分鐘悶場冇入球，非球迷自然大打呵欠，只有熱衷者才會享受箇中球味；細枱則像籃球比賽，由於枱細袋闊，入球易得多，較多Action，十分鐘左右便分勝負。大枱難學難精，細枱易學難精，香港生活節奏急促，難怪入門者大多選擇打細枱。
順應潮流，我亦開始轉打細枱，所以大Joe開了一間波樓對我說是大喜訊，從此以後，食完飯冇嘢做可以先去波樓打躉，唔使約腳，因為那裏長期有腳，加上大Joe設計的波樓跟我在加拿大蒲開的波樓感覺九成相似，歸屬感與安全感並在，有局冇局唔使再等星期六，上咗波樓先算。