分析Ｆ做分析做得太耐，想轉換環境，於是嚟一次孫悟空七十二變，變咗做對沖基金經理，以佢嘅聲名，立即有資產管理公司三顧草蘆，畀咗一筆錢佢管。可惜分析Ｆ（𠵱家改稱基金Ｆ）只做大戶、大機構，唔做師奶散戶啫，否則啲師奶必定嗒糖，爭住畀錢佢去投資。
基金Ｆ話：「對沖基金嘅風險比較高，我唔想俾人投訴，都係無謂做散戶住，大機構容易應付好多，願意承受風險，大家都知道遊戲規則，唔會輸波賴地硬嘅。」做基金經理與做分析有乜唔同呢？基金Ｆ大笑：「返工只係兩個月，已經覺得變化好大，以前做分析，透過經紀向客戶推薦買乜股物股，我哋係做sale，客戶聽唔聽，我哋冇計。但我現在係基金經理噃，做buyside，有權決定買唔買，你話係唔係爽好多呢！」
梗係爽好多啦，呢勻輪到經紀巴結佢咯，已經話送飛畀佢睇○六年七人欖球賽；藝術節重頭節目音樂會門票，唔使開聲，都有人話送緊過嚟。假如冇咗股票經紀，基金經理呢一行，香港嘅文化藝術節目更加冇人願意贊助，最貴嘅門票點會一早沽清吖，呢一樣中環文化，相信龍應台未必明白。
倫敦中心TottenhamCourtRoad有一間會所叫做SpearmintRhino，係著名豪華高級會所，內有美女如雲，可入貴賓房跳私家脫衣舞，大經紀、大投資銀行家、基金經理玩樂之地，負責找數嘅，十次有八次都會係經紀找數。呢類會所簡直就係富時一百指數（FTSE100）嘅不分割部份。點知最近大行（大摩、摩通）明令禁止踏足脫衣舞/豔舞夜總會，大家都震晒，以後相信阿仙奴對車路士啲高價票，更加搶手。
基金Ｆ為人乖仔，最有興趣嘅讀物就係公司年報與經濟數據，冇興趣落club，想做佢生意嘅經紀最好做定功課先，用飛係冇用嘅！