最近英國有研究報告指出，垃圾食物除對身體無益，食得多重有可能黐線！聽到都咪話唔驚，因為平民百姓最愛喺街邊篤魚蛋，幸好營養師黃榮俊表示，呢類食物都唔係完全無營養，點都有啲好處。咁就嗱嗱臨走轉旺角，睇吓𠵱家最受歡迎嘅「垃圾潮食」係乜東東，又有乜嘢營養。
記者：謝翠玲
攝影：譚盈傑
Model：Becky,Jimmy（Salvador）&Mavis
最受歡迎
茄汁章魚小丸子
以前嘅章魚小丸子係用麵糊包住章魚粒再配照燒汁，但最新口味係包埋芝士、香腸等餡料再配番茄汁，重榮登旺角人氣潮食。
有咩好？蛋白質豐富
章魚有蛋白質，麵粉含澱粉質夠飽肚，鮮番茄汁有茄紅素和維他命，全脂芝士碎則含高鈣，幫助骨骼生長和血液循環。
衰乜？油太多
章魚燒材料本來都健康，最弊係燒嘅過程中加入大量油，好容易吸收大量膽固醇。
第二位 串燒鵪鶉蛋
遠看以為係普通魚蛋，其實係外脆內軟嘅燒鵪鶉蛋，一串七粒，平均每5分鐘就見3個人密密食。
有咩好？明目護膚
卡路里唔高，蛋白脂肪含量低，對皮膚好。蛋黃中嘅磷質對眼好，維他命D有助鈣質吸收。
衰乜？膽固醇過高
每粒蛋黃有74毫克膽固醇，食晒成串就有成五百幾毫克膽固醇，超過每日建議不多於300毫克嘅攝取量。
第三位 熱辣辣糯米雞
唔係酒樓糯米雞，而係用雞髀去骨包住糯米飯，再先炸後燒。雖然每件有成半個拳頭咁大，熱辣辣夠份量，好啱肚餓食。
有咩好？雞肉夠低卡
雞肉卡路里唔高，含豐富蛋白質、維他命B1和B6，都算幾健康。
衰乜？難消化
營養師覺得這是最唔健康嘅小食，連皮炸嘅雞膽固醇較高，加上糯米難消化，腸胃唔好好易胃痛。
其他受歡迎小食
燒鮮魷魚香噴噴
新鮮魷魚原條燒，大大條夠香噴噴和𡁻頭，淋上辣醬汁更香濃惹味。
有咩好？低脂低澱粉質
魷魚含低脂肪和低澱粉質，且蛋白質豐富，係有營養嘅海鮮。
衰乜？高鹽份
每100克魷魚有231毫克膽固醇，食少少唔算嚴重。醬汁最好少加，因為高鹽份對身體無益。
炸芋條夠香脆
以芋頭代替薯仔嘅炸芋條入口鬆脆，更有一種薯條無嘅甘香，係新興旺角街頭小食。
有咩好？纖維豐富
芋頭比薯仔纖維豐富，卡路里亦會較低和易消化。
衰乜？高熱量
油炸食物最大缺點係高膽固醇高鹽份高熱量，當真少食多滋味。
燒鴨胸夠惹味
連皮燒嘅鴨胸感覺高貴，卻化身街頭小食，一串四片唔太重型啱過口癮。
有咩好？勁多鐵質
鴨胸脂肪低，鐵質豐富，蘸青檸醬汁同食，卡路里較低，算係最健康嘅街頭小食。
衰乜？皮最肥
如果連厚厚鴨皮同食，卡路里便回升不少，加上重味重鹽嘅沙嗲醬同食就更要打折扣。
藝人愛JunkFood
明星藝人都係人，都鍾意篤魚蛋，就算明知垃圾無益都無有怕！
多食「垃圾」易高血壓
根據陳諾偉醫生嘅意見，垃圾食物（JunkFood）唔係醫學名詞，無一個特別定義，大致指非正餐類別，純粹過口癮嘅食物。這些食物都有個共通點，高熱量，高糖和高鹽，熱量主要來自脂肪。長年累月咁食太多，容易積累太多膽固醇，引致高血壓和冠心病。
專家點睇
