金管局總裁任志剛近年愈嚟愈放，噚日上電台接受訪問時，竟然攞自己嚟開玩笑；話「聲色犬馬、嫖賭飲吹」中，有一半係佢嘅喜好！
任總解釋，自己喜歡聽音樂，因此好「聲」；又係馬主，所以愛「馬」；咁「賭」呢？佢話自己代表市民「賭」外滙基金的投資，認為小賭、小飲也可怡情，而佢鍾意飲人家啲酒，因此「飲」也是興趣之一。任總冇交代係飲邊個人啲酒，佢喺節目中強調，唔想被人當係某某人的「馬房」。
任志剛又話，回顧過去20多年，除咗年紀老咗之外，佢亦承認冇再好似以前咁「惡死」。
佢話𠵱家明白有責任透過記者去解釋政策，但年輕時曾經試過鬧記者：「你都唔做功課，重問咁多?」華華記得有次佢鬧記者，俾電台錄咗音直播出街，搞到佢要擺和頭酒，𠵱家佢表面上係收咗啲火，但傲氣就冇減到，所以大家如果唔想俾佢明窒或者暗寸，就真係要做吓功課。
講到佢嫁女，任總即時反應係：「好開心佢嫁得出！」唔知DeniseYam聽到阿爸咁講，會好嬲定好笑呢？
李華華