男人女人都靠不住，謝賢甚至認為，連演藝事業也靠不住，「我對演藝呢行，唔係全心全意，因為演藝唔係永久。」因此四哥曾嘗試多方面發展，多次決心離開演藝事業，數得出來的有三次，「第一次係同甄珍離婚之後，我退出娛樂圈，學人做建築、開聲雅廊、搞浴室，點知後尾識咗拉姑，透過佢認識無綫啲人，一做就做咗幾年，見到鏡頭都想嘔。」
跟拉姑結婚誕下兒子霆鋒和女兒婷婷之後，為了兒女着想，決定舉家移民加拿大，這是第二次離開娛樂圈，「點知傳媒又過嚟加拿大訪問我哋，喺香港嘅朋友見到報道，就打電話過嚟，要求我拍戲，盛情難卻，又再拍戲。」
息影被邀出山
在霆鋒進入娛樂圈之前，謝賢一度息影，兒子入行後，不免又再有人邀請他出山，「我注定要做呢一行，我個樣，一行出嚟就成個明星咁。」
後記：高潮到就除眼鏡
謝賢在亞視剛播完的劇集《情陷夜中環》中，有一幕床上戲，竟也戴着黑超，成為一時奇談。他這樣解釋：「都未到高潮，到高潮咪除囉！」
他說，眼鏡是他的標誌，他否認戴眼鏡是為了掩飾眼部皺紋，「我一入行就已經慣咗戴眼鏡，幾十年都係咁，拍古裝咪除囉。我唔係怕皺紋，我咁嘅年紀，有皺紋係正常嘅，而且有皺紋可以化妝，唔使靠眼鏡，我入戲院睇戲都戴住眼鏡㗎喇。」話口未完，謝賢就除下黑超，展示給記者看，「嗱！副眼鏡好淺色，戴咗唔會好黑。」終於，就在那一剎，記者可以一睹四哥的廬山真面目了。
撰文：蔡元貴
攝影：林德雄
協力：比華利
場地：港島高爾夫球會