天安（028）對上一次見報係兩個月前（11月20日）臨破位之日，啱對上星期五，天安又破短期頂，又有得諗。天安由見報日到家陣，累積升幅約38%，但現價（2.675元）相對未重秤前NAV5.17元，折讓講緊重有48%，祖國房地產股重有咁大折讓，冇乜幾多隻。又天安上個月公布出售上海國聯10%及上海新聯誼50%，代價2.9億銀，預計獲稅後溢利1.07億銀，順利搞掂，天安06年度中期（6月止）又有着落，NAV折讓亦進一步扯上近50%水位。更重要嘅係，天安進駐祖國房地產多年，喺呢次出售上海物業中，反映集團揸住嘅資產，隱藏價值非常豐厚。再講，呢期大孖沙中信泰富（267）出售又一城套現近62億銀，又投放逾百億轉戰祖國房地產，可見祖國market有排玩，天安喺祖國土儲接近4千萬平方呎，增值潛力唔講得笑。
中航技術博脫胎換骨
天安上星期五突破三角頂，交投唔算多，得兩球半，但反映投資者惜貨如金，有後抽喺2.6元落注，上番04年高位3.4元，另一個30%回報率。
中航技術（232）對上兩個星期，喺9仙至0.1元整咗個三角形，唔知上定落，但嚟緊日子，要擺入觀察名單。
中航月頭公布，同成都飛機及母系中航技總，訂立合組合營公司協議，專責研發及生產飛機零部件，中航佔40%。呢壇製作嘅爆炸性，在於中國未來20年需要2300架飛機，中航合營公司面向總值過萬億港銀嘅龐大市場，等股東特別大會通過，可以去馬。中航現價（9.2仙）相對NAV折讓30%，股價重喺5年低位載浮載沉，上邊合營順風順水，中航有條件脫胎換骨。
錢雋