陳太早前喺一個公開場合自爆最近有同煲呔食過飯，但點到即止，唔肯講嗰個係乜場合。經八方明查暗訪後，卒之發現陳太同煲呔，真係喺今個月初食過飯。不過，同枱重有好多人，唔係兩個靜雞雞撐枱腳。
話說肥彭時代嘅行政局議員，不時都會定期見面聯誼一吓，而且每次重輪流做host㖭。最新一次聚會就喺今個月初，咁啱呢次由陳太做host，咁啱又係煲呔啱啱喺北京述職後不久，所以兩個人就有機會見面。
想到禮賓府敍舊
當然啦，話明係肥彭時代嘅行政局議員，又點會得兩個人咁少？查實嗰日出席飯敍嘅，重有資深大狀張健利同麥列菲菲等，好鬼熱鬧。
既然咁多人一齊食飯，講的內容當然是風花雪月，不談正經事，八方聽聞大家都好忍得，做主人家的陳太同陳生，一句政改同民主步伐都無講，其他人等亦好識做，冇問長問短，煲呔全場都有講有笑，表現得若無其事，可能真係講吓福建之旅就算數。
最堅係陳太話希望煲呔搬入禮賓府後，有機會去坐坐大家敍吓舊，Donald一定收到，問題係佢好似重未發出邀請。喂，阿太新年就喺香港過，因為要陪老媽同屋企人，重要派吓利是，之後佢應該要去美國一行，接受波士頓一間大學頒授一個傑出領導人嘅獎項，所以曾生曾太有心請入伙酒，就要快手，等個約會可以成真，唔好講咗就算數。
講開陳生陳太，原來當日陳四萬上街第一次遊行，陳棣榮剛好人在澳洲，所以全不知情，陳太亦唔想丈夫掛心，冇事前通知，所以陳生都係嗰日先收到消息，知道陳太上街，要求北京畀一個普選時間表畀香港人，而最重要嘅訊息，當然係要煲呔反映港人訴求，盡快落實時間表，希望二○一二有普選喇。
爆料熱線：29290000、27860099
報料傳真：26239278
報料電郵：[email protected]