對男人，他會說：「女人靠唔住！」他指的是嘉玲、蕭芳芳、甄珍甚至狄波拉……「佢哋全部都傷害過我。」對女人，他又會說：「千祈唔好靠男人！」因為世上沒有不吃魚的貓。四哥謝賢，活到老，愛到老，幾十歲人，談情說性，依舊是口沒遮攔，依舊是眉飛色舞。
愛情篇：我愛的女人傷害我
「我唔係花弗，不過我覺得感情好脆弱。」謝賢的感情有幾脆弱？他先後跟多位銀幕上的玉女結合、分手、再結合、再分手，甄珍、嘉玲、芳芳、拉姑，沒有一段情可以天長地久。每一次的分手，都是一次傷害，「全部女人都傷害過我，女人靠唔住！」
專一源自尊重
原來四哥是個容易受傷的男人，他說，幾段緣份的終結，都不是由他作主動；每次分手，都並非由他提出，而每段情都是沒齒難忘，「佢哋個個都難忘……我唔知自己有冇傷害過佢哋，可能我睇唔到自己缺點，總之，一對戀人有問題，一定係雙方嘅問題。」
形象風流倜儻的謝賢否認花弗，就好像女人不認貪靚一樣，令人難以置信，但他的自辯是有根據的，「目前我只有一個女友，我覺得談戀愛要尊重自己同對方，一定要專一。」不過他說的專一，並非矢志不渝那一種，而是同一時間不應一腳踏兩船，「可以維持幾耐唔知，我會當係緣份，緣份係唔可以壓迫嘅。」
謝賢目前的女友才二十多歲，他從未見過對方的家長，「呢樣嘢，到時兵來將擋，家人睇雜誌睇到，咪話係普通朋友囉。」問他可有想過跟女友結婚，他說：「唔好問咁長遠，結婚嚟做乜？結完婚又離婚。」
男人一定會滾
四哥否認拒絕結婚是逃避責任的行為，「對女友一樣有責任㗎，起碼要尊重對方。」他抗拒婚姻，是因為沒有信心結婚後還可以保持兩情相悅，「初戀嘅時候就熱戀，結咗婚之後生仔之前重會有少少愛，生咗仔之後，邊度重有日日講Iloveyou？」
所以他說女人靠唔住，男人一樣靠唔住，「千祈唔好靠男人！出面社會五光十色，譬如去內地出差一個月，就算你唔去搵女人，女人都會搵你，男人唔食魚嘅，就唔係男人。」
