經典童星、現年三十九歲的王書麒，當遇上年僅七歲的新晉童星王樹熹（Jacky）時，彼此沒半點代溝，還迅速混熟起來。Jacky仔一見王書麒，竟天真地問：「點解你又叫舒淇（書麒）？」王書麒則覺得Jacky演技老積，但真人卻非常好玩。
不少演員均認為拍戲最難搞的是小孩和動物，不過當新紮童星、年僅七歲的王樹熹（Jacky）與曾參演港台劇《小時候》的經典童星、快將四十歲的王書麒走在一起時，卻絲毫沒出現捉雞仔情況，彼此還玩得十分開心，看在旁人眼中，還以為是兩父子。
早入行見識多
王書麒跟太太許秋怡育有一個兩歲半兒子，他甫見Jacky仔，已大顯慈父本色，而Jacky仔對這位陌生叔叔亦絲毫不怕羞，還童言無忌反問：「點解你又叫書麒？」原來Jacky仔誤會王書麒與舒淇同名同姓。
王書麒表示從螢幕上認識Jacky仔，他說：「我囝囝鍾意飛機，我就係睇《隨時候命》時知道Jacky仔同林保怡扮兩父子，佢嘅演出好老積。」跟Jacky仔混熟後，王書麒即抱起六十磅重的Jacky仔騎膊馬，玩完一輪後，王書麒大呻腰痠背痛，Jacky仔聞言即乖巧地為他揼骨。
跟Jacky仔相處過後，王書麒認為Jacky仔不失是充滿童真的小孩。王書麒十歲時開始演出《小時候》，問他可覺得太早入行會失去童真？他說：「咁又冇喎，反而早入行見識多咗，會比同齡嘅細路仔更懂分辨對錯，一直都冇行歪路。」
細妹妒路家敏
回想近三十年的演戲經驗，書麒遇到很多趣事，他說：「我當年同小敏（路家敏）拍《小時候》，佢扮演我妹妹，我親生細妹睇電視睇得好投入，竟然好妒忌我錫晒佢，有一次我返屋企見到妹妹係咁將小敏張相畫到花晒，不過我都有同妹妹解釋番只係做戲，佢始終先係我個親妹妹。」
而Jacky仔年紀小小就入行，在螢幕上表現亦不俗，問乳臭未乾的他到底知不知甚麼叫做戲？他竟一臉認真地回答：「我知㗎，咪喺鏡頭前做番啲劇情出嚟，我每次拍戲前都會睇天書（即劇本），有時導演無端端叫我喊，得我自己會做唔到，要對手同我交流先得，佢畀唔到戲我，我就做唔到出嚟。」說時樣子十分認真又老積，非常搞笑。
「我鍾意林保怡」
Jacky仔先後跟劉德華在電影《童夢奇緣》中扮「兩兄弟」、跟林保怡在《隨時候命》中飾演父子，問他最喜歡哪位對手，他衝口而出說：「我鍾意林保怡，因為佢好人。同劉德華拍《童夢奇緣》時，我拎咗佢個簽名就好滿足，但我冇將簽名拎返學校晒畀同學睇。」
Jacky仔課餘時要打工拍戲，損失了很多玩耍機會，問他想不想跟朋友仔玩，他說：「冇所謂，我覺得拍戲重好玩，有好多哥哥姐姐同我玩，一啲都唔辛苦。」Jacky仔農曆年又要到內地拍無綫新劇《太極》，扮演趙文卓的童年，是一個身體有缺陷的孤兒，Jacky仔謂已開始揣摩角色，他說：「我知今次個角色幾難演，我係個孤兒，𠵱家已經要學太極拳，暫時學咗八式。」說罷，紮紮跳的Jacky仔即興耍拳給記者大開眼界。
撰文：比華利 攝影：仇志德
