勁呀！Ichiban！Ichiban！今日約咗班雜技囡囡耍兩招，雖然佢哋未表演到重頭戲肉，但已經睇到我𠵱哇鬼叫，猛叫Encore！當中一位黃毛小子（原來係小女至真）Minami出場已蹦蹦跳無時停，去邊都勁識搶鏡，搞到見慣大場面嘅我都High埋，睇嚟佢真係注定食呢行飯！
記者：梁彩燕
攝影：伍慶泉
鳴謝：德高寵物渡假村（27926889）
換定靚衫先~
雜技狗狗露兩手~
最搶鏡：金毛強
來自日本「WowWow狗奇藝團」嘅四位雜技明星Minami、Margarine、Meg同Miyako係全女班，個個都有4、5年表演經驗。團內成員個個身懷絕技，要佢哋跳大繩、雙腳行、行梅花樁、行波波甚至蒙眼踩鋼線都係EasyJob！今次係佢哋自20年前韓國表演後首度出國，專程搭飛機嚟香港都係為咗趁新春ShowQuali！
大家初見面，我都未WarmUp好，染到成個「金毛強」咁款（當然係貴婦版本！）嘅Minami勁有先見之明，知道又到表演時間，已經一狗當先提起兩手好似人仔咁又跳又行，𠱁得在場觀眾（主要都係我）瘋狂無比！無論馴犬師內田博章先生同緊邊個玩、抱緊邊個、同緊邊個傾偈都好，Minami都會發揮佢嘅嬌嗲性格，全程吼實一有靚位攝得就攝，名副其實係攝石皇后一名！爭寵？點可以冇Minami！
沖涼？咪搞我！
整個雜技團總共有100隻雜技犬，個個都打扮得身光頸靚，全賴美容師內田志保小姐的功勞：「狗狗會知道表演前要扮靚靚，而我就會根據唔同狗狗的性格及表演技能而設計形象。Minami以前個頭係紅色㗎，後來覺得黃色都幾襯佢，舊年就同佢轉咗新Look；Miyako以前係『長毛賊』，因為佢醒目學得快又易上手，要Handle好多新絕技，𠵱家剪得清爽啲，活動都靈活啲！其實狗狗唔會唔鍾意扮靚，反而係唔鍾意沖涼多啲！」
秘技？食普通狗糧
耍雜技喎！成日又彈又跳，身形肥少少都難搞，真係要Keep到成個體操選手咁至得！「佢哋主要都係每日散步，最少行兩個半鐘，特別體操？冇㗎！喺食方面佢哋每日一餐，份量按身形比例而調校，通常係一至兩個量杯。因為氣候問題，春天會吃多點，當然運動量又會多點。」自問跳下大繩玩下波我都應付有如，要我一日一餐？饒命呀！
被遺棄的醜小鴨
咪睇狗狗演員個個都身壯力健咁精靈，查實團內30%狗狗係曾被遺棄，流落街頭冇啖好食㗎。好彩得雜技團收養，得餐溫飽重可以搖身變成雜技明星。
慢條斯理、成日好似警察咁視察環境嘅Meg當初都係被人遺棄，內田博章先生話：「當時團內有位馴犬師響路邊見到佢同另外兩隻狗狗，但團內已收養了太多狗狗，我爸爸（第二代創辦人內田義廣先生）便親自到路邊睇過，最終都是不忍心收養了牠們。」唔知係咪咁，阿Meg特別珍惜，學嘢好快好聰明，有時更會比馴犬師想前一步，知道下一步將會遇到甚麼難題和挑戰，好醒！唔怪得已成為《健力士紀錄大全》保持狗之一，創下10隻狗狗同時跳53次大繩紀錄！
黃埔健力士WowWow狗賀新春
日期：1月22日（預演）、1月27,28日
時間：1:00pm、3:00pm及5:00pm
地點：黃埔新天地時尚坊地庫（預演）、黃埔新天地船景街
表演內容：花式跳繩、新春梅花樁、WowWow狗賀新歲、高空鋼線行大運、空中飛犬等
查詢：21287347