𠵱家套套電影都誇耀自己用咗幾勁電腦特效，不論有冇需要！如果話你知喺呢個年頭，拍卡通動畫竟然有人唔用電腦CG，復古用番「人偶」逐格逐格拍Stop-Motion動畫，你會唔會好驚訝？講緊嘅係添布頓《怪誕屍新娘》；儘管曾經喺香港戲院上過畫，但好多人到𠵱家都誤會佢係電腦CG動畫，冇法啦！畫面暢順、人物動作生動、面部表情細緻又富情感，你話有乜辦法唔呃晒！
記者、攝影：朱崇德
大家掃碟場時，可能會發現《怪》有兩個版本，分別為禮品裝同普通版，不過喺度清楚話畀大家知，兩個版本DVD內容完全一樣；禮品版就多咗4張Postcard同一張大約A2尺寸的海報，喜唔喜歡都幾見仁見智；不過旺角老店DVDPRO就講明，兩個版本賣價$98完全一樣，不過海報就冇得送，冇諗住新年前換「牆紙」嘅，真係諗得過！
超精密人偶
電影最令筆者佩服係人偶表情動作豐富，又唔會好似泥膠公仔戲咁勁跳格！戲中200隻人偶都以金屬BallJoint骨架支撐，再加橡膠公仔表皮製作，最難表達的面部表情，則是以金屬齒輪帶動「面皮」郁動製作，精密之處儼如一隻瑞士表！每個人偶動作都是逐毫米移動，一張一張硬照拍下來滙集成電影！就以維達同維多利亞一段鋼琴前談情戲為例，短短2分鐘就拍了14星期，全片77分鐘真係耗盡工作人員不少心力！
數碼相機拍電影？
《怪》搵嚟尊尼特普演繹維達，屍新娘則以愛美莉華生演繹，兩者感情流露，令人睇得更入戲。令人印象最深的一幕，都係骷髏歌《都是白費》，以輕快jazz道盡了屍新娘悲慘一生，真係幾高難度吓！唔好話筆者偏心，雖然都係幕後人製作花絮，不過真係睇到唔捨得走，論到電影含義、導演的意念，真係幾到吓！人偶製作及拍攝過程超正！點樣幫屍新娘件婚紗做出飄逸效果，唔講都唔知咁高難度！不過更愛嘅係竟然發現成套電影，原來係用一部數碼相機拍攝，真係心機無限！
古仔講乜？
故事靈感來自俄國民間傳說，都係添氏一貫的黑色幽默加詭異浪漫，講賣魚仔維達，在貪慕虛榮的父母脅迫下，攀龍附鳳娶名門之後維多利亞，兩人雖然盲婚啞嫁，可幸一見鍾情；不過維達不小心在森林綵排結婚時，誤娶了屍新娘，一段美好姻緣變成人鬼傳奇故事。