曹永廉近日畀靈異節目主持李德蔭（別名鬼王德）話佢勾自己老婆，同埋○○年曾經搵自己幫手落降頭養鬼仔，主要想喺鄭敬基手上搶番女朋友鄺文珣。
最緊要女友知
曹永廉噚日喺銅鑼灣宣傳某品牌健康產品，一提到鬼王德呢單嘢，曹永廉就好勞氣咁話：「呢件事我唔想再講咁多，成件事得啖笑，我同女友（姜依蘭）都係拜觀音嘅，大半年前都將佢（鬼王德）畀我嘅平安符掉咗，都唔知係真定假，總之我同佢冇聯絡好耐。」
對於呢單養鬼仔傳聞，曹永廉重話：「佢（指鬼王德）講吖嘛，我唔想再提，搞到好迷信咁，再講就中咗人哋圈套，最緊要女友知。我一路冇行差踏錯，冇乜嘢唔見得人。我一向都係企喺佢（鬼王德）嗰邊，但人哋嘅家事唔想講咁多，我以後會帶眼識人。」
「有人居心叵測」
報道重話曹永廉寫過一張賀卡畀鬼王德，大讚佢嘅落降頭法力，曹永廉噚日話：「我只係幾年前寫張賀卡畀佢，但完全冇其他意思，有人做嘢居心叵測，竟然將四、五年前嘅嘢留低拎出嚟。我𠵱家會畀心機做嘢，好彩公司都信我。」
