耐人尋味：adidas新廣告扮Matrix無人知噏乜

上星期睇到呢個廣告，初頭以為係電影預告，睇落至知原來係NBA木狼球星KelvinGarnett嘅新波鞋廣告。廣告製作認真，出街個個都話好睇，但問一問觀眾，都無咩人知佢想講乜！唔解唔知，廣告係想講Garnett5種性格。

記者、攝影：梁學文（部份圖片由adidas提供）

5個造型5種性格

今次廣告入面以5個角色去比喻加納特喺場上嘅5種個性，加納特分別化身為戰場上嘅軍官、救美英雄、童年加納特、羅馬驕雄同埋娛人先生，每個角色都代表住加納特個性豐富嘅真性情。加納特嘅演出亦得到導演嘅讚賞，導演NoamMurro話：「如果加納特唔打籃球，可以打電話畀我，因為佢嘅演出實在不錯。」睇來加納特唔打籃球，都可以好似摔角手TheRock咁拍吓戲。

軍官
■軍官造型代表住加納特係球場上出色嘅指揮官，帶領住球隊勇往直前爭取勝利。

童年加納特
■廣告中童年加納特，代表咗加納特以年輕人有嘅充沛精力參與比賽，同埋表現出加納特身手靈活。

羅馬驕雄
■羅馬驕雄反映出加納特擁有無比嘅爭勝意志，同時又表現出加納特對球賽嘅熱情同比賽心態。

娛人先生
■加納特本身擁有迷人個性，喺球場上時常成為焦點。加納特嘅打法除富娛樂性外，為人亦愛開玩笑，極具幽默感。

廣告逐格睇

001>>一開始KG就喺戰場上指揮佢嘅軍隊。

002>>就算槍林彈雨KG都指揮若定。

003>>戰場一轉就轉到屋頂。見到美女墮樓，KG飛身將佢救起。

004>>童年加納特喺公園跟朋友玩，靈活地避過女童嘅捕捉。

005>>鏡頭一轉就去到羅馬競技場，加納特化身帝國驕雄，展開一場生死鬥。

006>>站喺舞台上面，觀眾為佢而歡呼。

007>>加納特向後退，跟觀眾講ByeBye。

008>>最後KG做回自己，步入球場露出欣喜笑容。

5個人得1個睇得明

李力持：畫面靚但唔知講乜！

計埋今日，廣告出咗街成個禮拜，好多人睇就睇過，睇過嘅人都讚條片製作認真，拍到好似電影Trailer咁，不過唔講真係唔知想講加納特嘅5種性格。嗯，好似失敗咗啲喎！導演李力持都話：「adidas嘅廣告不嬲製作都好認真，拍到成套戲咁，係一個大製作。Visual上幾好睇，特別係過場效果做得好好，不過想講咩我就唔知道喇，你唔講係5種性格，我真係唔知原來係咁。」睇來adidas近來嘅廣告，都同T-mac個神化廣告一樣，好睇唔好食！

過場做得好正，特別係戰場轉屋頂，做得好流暢。不過唔講我真係唔知原來係講KG嘅性格。

開頭以為有新戲上，但係真係唔知講乜。

我鍾意KG，一睇就知係講佢喺球場上嘅性格啦！

我知佢係賣波鞋，但係唔知5個造型想表達啲乜。

新鞋Garnett06'─古典外形+新科技

成條廣告都拍到好似套戲咁，有爆炸場面又有激烈嘅打鬥，製作成本分分鐘高過一部港產片。搞咁多嘢，都係想Sell對新波鞋，咁對鞋又有幾勁呢？新波鞋叫做Garnett06'，加納特都有份設計。因為加納特鍾意經典鞋款Samoa，所以新鞋就糅合古典外觀同新科技而成。功能上，採用a3PowerStructure系統，可以減輕鞋身重量，亦有緩震承托嘅效能。另外，新鞋分別喺鞋頭、鞋脊同鞋舌加入麖皮質料，增添一份時尚感。

■Garnett06'鞋頭設計參照經典鞋款Samoa而設計，具古典味道之餘亦有時代感。$890

■鞋背有「1」字樣，鞋側就有KG嘅簽名。

廣告網頁： http://www.adidas.com/hk/campaigns/kg3hk/content/

Shop：
adidasshop（27306685）
尖沙嘴海港城2樓2202號舖