食飯之時，賓架P話要請秘書，請大家介紹。我哋話大銀行請秘書，自有人力資源部代勞，何須朋友推介，賓架P話：「總之你哋知道有好嘅就通知聲啦。」
何謂好秘書，唔容易界定。賓架M當年移民澳洲攞護照，在雪梨分行返工，嗰位澳洲小姐秘書準時九點返工，四點半就預備放工，賓架M到咗四點九就唔敢叫秘書做嘢，好多文件、備忘錄、書信都係等秘書小姐準時五點鬆人之後先至得閒坐低響度，係咁寫，因為行政人員通常要見客、開會、接電話，時時都係忙到四點幾先至可以靜下來嘅啦。賓架M寫埋一大堆，放喺outtray，第二朝返工，秘書小姐就會面黑黑咁對佢講：「你昨晚冇返屋企瞓咩？」
返到嚟香港就好咯，賓架M位秘書會早啲返工，賓架M行入房，熱咖啡已準備妥當，晚上七點去食客戶應酬飯，秘書先至開始執文件鎖櫃，勤力兼有效率，勝過澳洲秘書多多聲。
賓架C曾經奉調紐約，銀行派佢一位秘書，只係顧住扮靚、瘦身，做事唔交帶，於是向人力部要求換人，一換就換咗一位男黑人，斯文到得人驚，與丹素華盛頓、WillSmith、高比拜恩嗰種款完全不同，重會向賓架C眨眉眨眼，賓架C怕惹上麻煩又要求換人，人力資源部警告佢唔好太急，以免俾人指控種族歧視，三個月後，換來一個波多黎各女黑人，粗聲粗氣粗線條，熱情有餘，做事實在粗得滯，賓架C再要求換人，呢次俾人力資源部投訴番轉頭：「你如果係要一位華裔女秘書，可能表現咗你嘅性別歧視，種族歧視真面貌！」
賓架C與賓架M話：「秘書最好係香港女士，冇得彈！」鬼唔知，但係九八至○三年間，各公司大事裁員，淘汰咗一批資深高薪秘書，不少女士因此退出就業市場，賓架P如果容易搵到合心水嘅秘書，使乜叫我哋代為留意吓！」